पहिला बूट मीच फेकून मारेन… संजय राऊत कुणावर भडकले?
संजय राऊत यांनी निवडणूक आयुक्त ज्ञानेश कुमार, पंतप्रधान मोदी आणि अमित शाह यांच्यावर तीव्र टीका केली आहे. "लोकशाहीची हत्या" केल्याचा आरोप करत राऊत म्हणाले, "देशातील गद्दारांना पहिला बूट मीच फेकून मारेन."
आताचा भारत हा जंतरमंतर नंतरचा आहे. मोदींनी गुंगीचं औषध दिलेला हा भारत नाही. हा जागृत भारत आहे. या भारतात तरुण रस्त्यावर उतरतात. झुरळांची फौज रस्त्यावर उतरली. आम्ही त्यांच्यासोबत आहोत. आताही या कॉकरोचने निवडणूक आयुक्तांविरोधात आवाज उठवला आहे. अभिजीत दीपकेने अल्टिमेटम दिलाय तो योग्यच आहे. त्यामुळे आता काही लोक देश सोडून पळून जातील, असा दावा ठाकरे गटाचे नेते संजय राऊत यांनी केला आहे. मीडियाशी संवाद साधताना राऊत यांनी पुन्हा एकदा मुख्य निवडणूक आयुक्त ज्ञानेश कुमार यांच्यावर हल्ला चढवला असून दीपके यांचं समर्थन केलं आहे. तसेच देशातील गद्दारांना पहिला बूट मीच फेकून मारेन, असं राऊत यांनी म्हटलं आहे.
ज्ञानेश कुमार हे गुन्हेगार आहेतच. पण देशाचे खरे गुन्हेगार पंतप्रधान नरेंद्र मोदी आणि केंद्रीय गृहमंत्री अमित शाह आहेत. सर्वच क्षेत्रात त्यांनी हुकूमशाही पद्धतीने निर्णय घेतला आहे. त्यांनी लोकशाहीची हत्या केली आहे. इंदिरा गांधी या लोकशाहीच्या सर्वात मोठ्या संरक्षक होत्या. त्यांनाही निवडणूक घोटाळे करून जिंकता आलं असतं. पण त्या पराभूत झाल्या. त्यांनी लोकशाहीचा आदर राखला, असं संजय राऊत म्हणाले.
यांचा बाप खाली उतरला तरी…
सध्याच्या माफिया गँगने सर्व यंत्रणांवर ताबा मिळवला आहे. राष्ट्रपती, निवडणूक आयोग, सुप्रीम कोर्टसह सर्वांना गुलाम केलं आहे, असं सांगतानाच 2029मध्ये फेरबदल होतील. यांचा बाप जरी खाली उतरला तरी फेरबदल होणारच आहे. त्यामुळे ज्ञानेश कुमार यांनी आता माफीचा साक्षीदार होणच योग्य आहे. ज्ञानेश कुमार यांच्यावर महाभियोग चालवण्यासाठी आधी नोटीस दिली होती. पण राज्यसभेच्या सभापतींनी ती फेटाळून लावली होती. आता त्यांना ती फेटाळता येणार नाही, असं राऊत यांनी सांगितलं.
पळून पळून मारतील
राहुल गांधी दयावान आहेत. राष्ट्राच्या हितासाठी काम करत आहेत. निवडणूक आयोगाची गद्दारी समोर आणत आहे. येत्या 2029मध्ये देशात न्याय सरकार येणार आहे. देशातील गद्दारांना जोडे मारले जातील. पळून पळून त्यांना जोडे मारले जाणार आहेत. या गद्दारांना पहिला बूट मीच फेकून मारेन, असं राऊत म्हणाले.
भाजपने इव्हेंट करू नये
यावेळी त्यांनी दुष्काळावरही प्रतिक्रिया व्यक्त केली. कर्जमाफीची घोषणा झाल्यावर बोलू. आधीची कर्जमाफी कुणाला मिळाली? राजकारणापलिकडे जाऊन पाहावं लागेल. शेतकऱ्यांना दिलासा देण्यासाठी सर्वपक्षीय बैठक बोलावली पाहिजे. दुष्काळ निवारणाचा भाजपने इव्हेंट करू नये, असा टोला त्यांनी लगावला.
