शिंदे VS ठाकरे, संघर्षाला पुन्हा सुरुवात, घडामोडी वाढल्या, दसऱ्याआधी काय घडणार?

मुंबई | 29 सप्टेंबर 2023 : शिवसेनेच्या दसरा मेळाव्याच्या आधी कार्यक्रमाच्या ठिकाणावरुन दोन्ही गटांमध्ये संघर्ष बघायला मिळण्याची शक्यता आहे. 24 ऑक्टोबरला दसरा मेळावा आहे. मात्र गेल्या वर्षी प्रमाणंच याही वर्षी मेळाव्यावरुन शिंदे आणि ठाकरे आमनेसामने आले आहेत. कारण दोन्ही गटानं शिवाजी पार्कच्या मैदानासाठी महापालिकेकडे अर्ज केलाय. दसरा मेळाव्यावरुन एकनाथ शिंदेंची शिवसेना आणि उद्धव ठाकरेंची शिवसेना पुन्हा आमनेसामने आलीय. दादरच्या शिवाजी पार्क मैदानासाठी शिंदे गट आणि ठाकरे गट या दोघांनीही मुंबई महापालिकेकडे महिनाभरआधीच अर्ज दिलाय. त्यामुळे शिवाजी पार्कावर कोणाचा आवाज घुमणार? याकडे मुंबईकरांसह महाराष्ट्राच्या नजरा असतील. शिवसेना आणि शिवाजी पार्कावरील दसरा मेळावा हे समीकरण आहे.

मात्र, निवडणूक आयोगाकडून सध्या शिवसेना शिंदे गटाला मिळालीय. त्यामुळे शिवाजी पार्क आम्हालाच मिळावं, अशी मागणी शिंदे गटाची आहे. गेल्या वेळीही शिंदे आणि ठाकरे गटाकडून अर्ज करण्यात आले होते. मात्र मुंबई महापालिकेनं दोन्ही गटाचे अर्ज फेटाळले आणि कोणालाही मैदानाची परवानगी दिली नव्हती. त्यानंतर ठाकरे गटानं मुंबई हायकोर्टात धाव घेतली. त्यानंतर हायकोर्टानं ठाकरे गटाला शिवाजी पार्कवर मेळावा घेण्यास परवानगी दिली. त्यामुळे उद्धव ठाकरे गटाचा मेळावा शिवार्जी पार्कवर झाला तर शिंदे गटानं बीकेसीत मेळावा घेतला.

शिवसेनेचे पहिल्यांदाच दोन मेळावे

एकनाथ शिंदेंच्या बंडामुळं शिवसेनेत फूट पडली. त्यामुळे शिवसेनेच्या इतिहासात पहिल्यांदाच गेल्या वर्षी 2 मेळावे झाले. त्यामेळाव्यातही ठाकरे आणि शिंदेंमध्ये शाब्दिक चकमक उडाली होती. आता शिवाजी पार्कातून कोणाची तोफ धडाडणार, हे येत्या काही दिवसांत कळेलंच. पण शिवाजी पार्कातला मेळावा शिंदे आणि ठाकरे दोघांसाठी आगामी निवडणुका पाहता महत्वाचा आहे.

मुंबई महापालिकेच्या निवडणुका प्रलंबित आहेत. 6 ते 7 महिन्यातच लोकसभेच्या निवडणुका आहेत. त्यामुळे शिवाजी पार्कातून दसरा मेळाव्याला शक्तिप्रदर्शन करण्याचा प्रयत्न शिंदे आणि ठाकरे दोघांचाही असेल. अर्थात, मुंबई महापालिकेकडून कोणाचा अर्ज मंजूर होतो, आणि कोणाला शिवाजी पार्क मैदान मिळतं? याची उत्सुकता असेल.