Devyani Farande| 2 टर्म आमदारकी, महापालिकेतही छाप; परखड नेतृत्व देवयानी फरांदेंच्या वाटचालीवर वाढदिवसानिमित्त नजर …

नाशिकः ऐन निवडणुकीच्या तोंडावर महापालिकेतील सत्ताधारी भाजपला आरसा दाखवण्याची हिंमत करू शकतात, त्या म्हणजे आमदार देवयानी फरांदे. (Devyani Farande) विशेष म्हणजे त्याही स्वतः भाजपच्या. (Bjp) नाशिकधील डेंग्यूवरून महापालिकेला लक्ष्य करणाऱ्या आमदार फरांदे यांनी रस्त्यांच्या निकृष्ट कामावरूनही तोफ डागली. या कामाची जोपर्यंत आयुक्त स्वतः पाहणी करून अहवाल देत नाहीत, तोपर्यंत कंत्राटदाराची बिले देण्यात येऊ नये, अशी सूचनाही केली. अन् त्यापूर्वी सत्ताधारी महाविकास आघाडी सरकारविरोधात वाढीव वीजबिलावरून जोरदार आंदोलनही केले. ही दोन उदाहरणे यासाठीच की, पक्ष स्वतःचा असो की, दुसरा. आमदार देवयानी फरांदे या कायम अभ्यासू व परखड नेतृत्व गुणांमुळेच चर्चेत राहतात. त्यांचा आज 12 जानेवारी रोजी वाढदिवस. त्यानिमित्त त्यांच्या आजवरच्या कामावर एक नजर…

नेतृत्वाची पायाभरणी

देवयानी फरांदे. विधान परिषदेचे माजी सभापती प्रा. ना. स. फरांदे यांच्या स्नुषा. गेल्या 35 वर्षांहून अधिक काळापासून त्या राजकारणात सक्रिय आहेत. शालेय जीवनापासून त्यांनी अनेक स्पर्धा गाजवल्या. यश मिळवले. पुढे विद्यार्थी मंडळाचे अध्यक्षपदही भूषवले. त्यांच्या नेतृत्वगुणाची पायाभरणी अशी लहानपणापासूनच होत आली. त्यांना आदर्श विद्यार्थिनी पुरस्काराने गौरवण्यात आले होते. प्रा. देवयानी फरांदे यांनी केटीएचएम महाविद्यालयात बी.एस्सी केली. पुढे त्यांनी पुणे विद्यापीठातून मायक्रोबायोलॉजी एम.एस्सी. पूर्ण केले. त्यानंतर मविप्रच्या बी. फार्मसी महाविद्यालयात प्राध्यापिका म्हणून रुजू झाल्या.

महिलांसाठी काम

सामाजिक, राजकीय जबाबदाऱ्या सांभाळून त्यांनी उत्तर महाराष्ट्र विद्यापीठातून दुसरीकडे पीएचडीचे शिक्षणही सुरू ठेवले. शैक्षणिक, सामाजिक क्षेत्रातही प्रभावी ठसा उमटवला.  महिल्यांच्या अनेक विषयांवर काम केले. वुमेन्स फोरम आणि दुर्गा महिला बहुउद्देशीय विकास संस्थेची स्थापना केली. या दोन्ही संस्थांच्या माध्यमातून नारीशक्तीला एक स्वतंत्र व्यासपीठ मिळाले. विशेष म्हणजे त्या 18 जून 2021 पर्यंत प्राध्यापक म्हणून कार्यरत होत्या. अखेर राजकीय आणि सामाजिक कामातील व्यापामुळे त्यांनी नोकरीचा राजीनामा दिला. त्यांचे माहेरकडचे आडनाव पटेल आहे. कॉलेजमध्येही त्या पटेल मॅडम म्हणून परिचित आहेत.

महापालिका गाजवली

देवयानी फरांदे यांनी एकीकडे शिक्षण क्षेत्रात काम करताना दुसरीकडे राजकारणात रमणारे पती सुहास फरांदे यांनाही मोलाची साथ दिली. पुढे त्या राजकारणातही सक्रिय झाल्या. सर्वप्रथम 1997 साली त्यांनी नगरसेवकपदाची निवडणूक लढविली आणि नगरसेविका झाल्या. तेव्हापासून त्यांनी राजकारणात कधी मागे वळून पाहिले नाही. विशेष म्हणजे नाशिक महापालिकेत त्या सलग 3 वेळा नगरसेवक म्हणून निवडून आल्या. त्यांनी या काळात उपमहापौरपदाची जबाबदारी समर्थपणे सांभाळली. उपमहापौरपदी काम करताना त्यांनी घरपट्टी, पाणीपट्टी वाढ, घनकचरा व्यवस्थापन, गोदा प्रदूषण आदी कळीचे मुद्दे लावून धरले.

दुसऱ्यांदा आमदार

देवयानी फरांदे यांचे हेच काम पुढच्या भावी राजकीय करिअरची शिदोरी ठरले. त्यांची ही तडफदारी आणि कामाचा उरक पाहून भारतीय जनता पक्षाने त्यांच्यावर प्रदेश महिला मोर्चाच्या जबाबदारीसह चिटणीसपद दिले. तब्बल 9 वर्षे त्यांनी ही जबाबदारी यशस्वी पार पाडली. नाशिकमध्ये 2009 मध्ये शहरातील मतदारसंघाची पुनर्रचना झाली. या मतदारसंघात सर्वप्रथम महाराष्ट्र नवनिर्माण सेनेने विजय मिळवला. मात्र, त्यानंतर 2014 मध्ये झाल्या निवडणुकीत भाजपच्या देवयानी फरांदे यांनी बाजी मारली. सलग दोन वेळेस त्या नाशिक मध्य मतदारसंघातून आमदार म्हणून विजयी झाल्या. या काळातही त्यांनी भरपूर कामे केली. त्यांच्या येणारा राजकीय भविष्यकाळ त्यांच्या अभ्यासू आणि परखड नेतृत्वगुणामुळे उज्ज्वल आहे.

थोडक्यात परिचय

– गेल्या 35 वर्षांपासून भारतीय जनता पक्षाचे काम.

– महाविद्यालयीन जीवनात जनरल सेक्रटरी राहिल्या.

– 1997 ते 2014 या कालावधीत 3 वेळा नगरसेवक.

– नाशिक महापालिकेत आपल्या कार्याची छाप सोडली.

– 2009 ते 2012 या काळात उपमहापौरपद भूषवले.

– 2004 ते 2013 मध्ये महिला मोर्चा प्रदेश चिटणीस पद सांभाळले.

– अभ्यासू व परखड नेतृत्व गुणांमुळे विधानसभा पक्ष प्रतोदपदी निवड.

– विधिमंडळाच्या इतर मागासवर्गीय समिती व उपविधान समिती सदस्य.

– 2015 च्या तृतीय (हिवाळी) अधिवेशनातील सभाध्यक्ष तालिकेवर नियुक्ती

– 2019 मध्ये नाशिक विधानसभा (मध्य) मतदार संघातून दुसऱ्यांदा आमदार म्हणून निवड.

इतर बातम्याः

नाशिक महापालिका निवडणुकीत सन्मानपूर्वक आघाडी, भुजबळांचे संकेत, शिवसेना अन् काँग्रेस राजी होणार का?

Thief’s letter:‘सॉरी मला माफ करा’ म्हणत चोरट्याचे अफलातून पत्र, पुढे जे काही झाले ते वाचून व्हाल थक्क!

Nashik Train| नाशिककरांच्या चेहऱ्यावर हास्य खुलवणाऱ्या भुसावळ-इगतपुरी मेमूचा आज श्रीगणेशा; 18 रद्द गाड्याही आजपासून पूर्ववत