नवी मुंबईतील उद्यान घोटाळाप्रकरणी अधिकारी आणि कंत्राटदारावर निलंबनाची कारवाई

नवी मुंबई: गेल्या काही दिवसांपासून नवी मुंबईत (Navi Mumbai) गाजत असलेल्या उद्यान घोटाळाप्रकरणी प्रशासनाकडून अखेर कारवाई करण्यात आली आहे. याप्रकरणी कंत्राटदार आणि सरकारी अधिकाऱ्यांवर कारवाई झाली आहे. तीन सरकारी अधिकाऱ्यांना निलंबित करण्यात आले आहे. यामध्ये मनपा उद्यान अधिकारी चंद्रकांत तायडे, सहाय्यक उद्यान अधिकारी भालचंद्र गवळी आणि उद्यान अधीक्षक प्रकाश गिरी यांचा समावेश आहे. तर दोन कंत्राटदारांचे कंत्राट रद्द करण्यात आले. (Navi Mumbai garden scam)

लॉकडाऊनच्या काळात कोणतीही कामे न करता कंत्राटदारांनी सरकारी अधिकाऱ्यांच्या संगनमताने 8 कोटींची बिले मंजूर करवून घेतली होती. भाजप आमदार मंदा म्हात्रे यांनी या घोटाळ्याविरोधात आवाज उठवला होता. त्यामुळे नवी मुंबईत हे प्रकरण चांगलेच गाजले होते. या घोटाळ्यातील कंत्राटदारांवर दंडात्मक कारवाई करण्यात आली आहे. त्यांना 15 दिवसांत 8 कोटी 34 लाख रुपये भरण्याचे आदेश देण्यात आले आहेत.

काय आहे उद्यान घोटाळा?

ठेकेदारांनी अनेक ठिकाणची कामेच केली नाहीत, तर उद्यान विभागाच्या अधिकाऱ्यांनी ही देयके न तपासताच मंजूर केली होती. नवी मुंबई महापालिका क्षेत्रात वंडर्स पार्क, रॉक गार्डन यासह २८० उद्याने आहेत. या उद्यानांची यापूर्वी प्रकल्पग्रस्त ठेकेदारांमार्फत विभागानुसार देखभाल केली जात होती.

मात्र, गेल्या वर्षी ही परंपरागत ठेकेदारी पद्धत रद्द करीत परिमंडळ १ व परिमंडळ २ अशी विभागणी करीत फक्त दोनच ठेकेदारांनी ही कामे देण्यात आली होती. १ मेपासून ही कामे देण्यात आली होती. मात्र करोनाच्या काळात उद्यानांची देखभाल दुरुस्तीकडे ठेकेदारांनी दुर्लक्ष केले. कामाची देयके मात्र घेतली, यावर लोकप्रतिनिधींनी आक्षेप घेतला होता.

संबंधित बातम्या:

नवी मुंबईच्या कोविड टेस्टिंग सेंटरमध्ये मोठा घोटाळा; 10 वर्षांपूर्वी मृत्यू झालेल्या व्यक्तीचा अहवाल देऊन पैसे लाटल्याचा प्रकार उघड

नवी मुंबईतील कोविड टेस्टिंग घोटाळाप्रकरणी सरकारची कारवाई; एक अधिकारी निलंबित

(Navi Mumbai garden scam)