हॅशटॅग लायकी वापरत निलेश राणेंना जोरदार टोला, नवनाथ बन यांनी थेट फोटोच केले शेअर..
पदवीधर आणि शिक्षक मतदार संघाच्या निवडणुकीत मोठा धक्का भाजपाला बसला. महायुतीचा फक्त दोन जागांवर विजय झाला तर महाविकास आघाडी तब्बल 3 जागांवर विजयी झाली. त्यानंतर महायुतीचे नेते मोठे आरोप करताना दिसत आहेत.
राजकारणात प्रत्येक टीकेला शब्दांनीच उत्तर द्यावे लागते असे नाही, कधी एक फोटो आणि त्यासोबतचे मोजके शब्दही बरंच काही सांगून जातात. विधान परिषदेच्या शिक्षक आणि पदवीधर निवडणुकीनंतर महायुतीतील वाद चव्हाट्यावर आला. दोन्ही बाजूंनी सातत्याने गंभीर आरोप केले जात आहेत. नवनाथ बन थेट शिंदेंच्या शिवसेनेवर आरोप करत आम्हाला शिंदेंच्या पक्षाने निवडणुकीत सहकार्य केले नसल्याचे म्हटले. दोन्ही पक्षातील वाद वाढत आहे. नवनाथ बन आणि रविंद्र धंगेकर एकमेकांवर टीका करत आहेत. दुसरीकडे आमदार निलेश राणे यांनीही एकनाथ शिंदेंवरील टीकेनंतर नवनाथ बन यांच्यावर टीका केली. यादरम्यान निलेश राणे यांना उत्तर देत नवनाथ बन यांनी सोशल मीडियावर एक पोस्ट शेअर केली. या पोस्टमध्ये त्यांनी नारायण राणे यांच्यासोबतचे फोटो शेअर केले.
हे फोटो शेअर करत त्यांना हॅशटॅग जबरदस्त दिला. शिवसेनेचे आमदार निलेश राणे यांनी नवनाथ बन यांच्यावर टीका करत त्यांची लायकी काढल्यानंतर बन यांनी थेट शब्दयुद्धात न उतरता खास शैलीत त्यांना उत्तर दिले. नवनाथ बन माझा मित्रबित्र नाही, तो माझा ज्युनिअर आहे. मी 2009 साली खासदार झालो, तेव्हा तो चड्डीत होता.
मी ऐऱ्यागैऱ्यांना मित्र बनवत नसतो, अशा शब्दांत निलेश राणे यांनी टीका केली होती. त्यानंतर सोशल मीडियावरही त्यांनी बन यांच्यावर निशाणा साधला. या टीकेला प्रत्युत्तर देताना नवनाथ बन यांनी निलेश राणे यांचे वडील आणि माजी केंद्रीय मंत्री नारायण राणे यांच्यासोबतचा एका पत्रकार परिषदेमधील फोटो शेअर केले. यातील एका फोटोत दोघे एकमेकांना बोलताना दिसत आहेत.
या फोटोत बन हे नारायण राणे यांच्या शेजारी बसलेले दिसत आहेत. कॅप्शनमध्ये त्यांनी लिहिले की, ज्युनिअर नवनाथ बन विथ सिनिअर राणे साहेब निलेश राणे यांनी वापरलेल्या ज्युनिअर या शब्दालाच आपल्या उत्तराचे माध्यम बनवले. विशेष म्हणजे निलेश राणे यांच्या टीकेला प्रत्युत्तर देताना बन यांनी कोणतीही आक्रमक भाषा वापरली नाही, कोणताही वैयक्तिक आरोप केला नाही.
