नवीन कपड्यांची छोटीशी इच्छा… तीही अधुरी राहिली; शेतकऱ्याच्या शाळकरी मुलाचं टोकाचं पाऊल, परभणीतील घटनेनं काळीज हेलावलं
परभणीच्या एका गावात सहलीला जाण्यासाठी नवीन कपडे नसल्याच्या विवंचनेतून 14 वर्षीय मुलाने टोकाचं पाऊल उचलल्याची घटना समोर आली आहे. सोयाबीनचे पैसे आल्यानंतर कपडे घेऊन देण्याचं वडिलांनी आश्वासन दिलं होतं, मात्र...
निसर्गाचा लहरीपणा आणि पिकाला न मिळणारा भाव अन् दुष्काळ यामुळे शेतकरी आधीच मेटाकुटीला आला आहे. याच हलाखीच्या परिस्थितीचे आता थेट शेतकऱ्यांच्या मुलांच्या भावविश्वावर भयंकर परिणाम होऊ लागले आहेत. परभणी जिल्ह्यातील एका गावात अशीच एक काळीज पिळवटून टाकणारी विदारक घटना उघडकीस आली आहे. शाळेच्या सहलीला जाण्यासाठी नवे कपडे घेता न आल्याच्या नैराश्यातून एका १४ वर्षीय शाळकरी मुलाने आपलं आयुष्य संपवलं आहे. एका बाजूला पैसा नाही आणि दुसऱ्या बाजूला मुलाचे हट्ट पुरवण्याची ऐपत नाही, अशा कोंडीत सापडलेल्या शेतकरी बापाचा आक्रोश काळीज चिरणारा आहे.
मिळालेल्या माहितीनुसार, या गावात राहणाऱ्या एका शेतकऱ्याचा उदरनिर्वाह पूर्णपणे शेतीवर अवलंबून आहे. त्यांच्या १४ वर्षांच्या मुलाच्या शाळेची सहल जाणार होती. सहलीला जाण्यासाठी त्याला नवीन कपड्यांची आस लागली होती. त्याने वडिलांकडे नव्या कपड्यांचा हट्ट धरला. मात्र, कुटुंबाची आर्थिक परिस्थिती बेताची होती. खिशात पैसे नसताना हट्ट कसा पुरवायचा, हा मोठा प्रश्न पित्यासमोर होता. त्यांनी मुलाची समजूत काढत, “सोयाबीनचे पैसे आले की तुला नक्की नवीन कपडे घेऊन देईन,” असं मायेने आश्वासन दिलं.
मुलगा सोयाबीनचे पैसे येण्याची वाट पाहू लागला. मात्र, सहलीचा दिवस जवळ येऊनही हातात पैसे आले नाहीत. पैशांची जुळवाजुळव न झाल्याने वडिलांना लेकाला दिलेला शब्द पाळता आला नाही. नवे कपडे न मिळाल्याने मित्रांसोबत सहलीला कसं जायचं, या विचाराने मुलाच्या कोवळ्या मनाला प्रचंड वेदना झाल्या. गरिबीच्या याच विवंचनेतून आणि नैराश्याच्या भरात या १४ वर्षीय निष्पाप जीवाने थेट मृत्यूलाच कवटाळलं.
या धक्कादायक घटनेची माहिती मिळताच पोलिसांनी घटनास्थळी धाव घेतली. परभणी ग्रामीण पोलीस ठाण्यात अकस्मात मृत्यूची नोंद करण्यात आली आहे. शेतकऱ्यांच्या हलाखीच्या परिस्थितीचा फटका आता त्यांच्या पुढच्या पिढीला कसा बसत आहे, हे या दुर्दैवी घटनेतून विदारकपणे समोर आलं आहे. या घटनेमुळे परिसरातून मोठी हळहळ व्यक्त केली जात आहे.
