पिंपरी-चिंचवड गोळीबार प्रकरणात सर्वात मोठा खुलासा! बिश्नोई गँगचे ३ शूटर गजाआड; ‘सिद्धू मूसेवाला’ कनेक्शन उघड!

पिंपरी-चिंचवडमध्ये खळबळ उडवणाऱ्या ‘ए. जे. फर्निचर मॉल’ गोळीबार प्रकरणाचा पोलिसांनी थरारक उलगडा केला आहे. या प्रकरणात पिंपरी-चिंचवड पोलिसांनी थेट उत्तराखंडमधील हरिद्वार येथून बिश्नोई गँगच्या तीन शूटरना अटक केली असून, या तपासातून सिद्धू मूसेवाला हत्याकांडाशी संबंधित धक्कादायक धागेदोरे समोर आले आहेत. तब्बल दोन कोटी रुपयांच्या खंडणीसाठी हा संपूर्ण कट रचण्यात आल्याचे तपासात निष्पन्न झाले आहे. नेमका काय आहे हा प्रकार? जाणून घेऊया.

15 मे 2026 रोजी रात्री सुमारे 9 च्या सुमारास रावेत-ताथवडे बीआरटी रोडवरील ‘ए. जे. फर्निचर मॉल’बाहेर मॉलचे मालक जगदीश बिश्नोई बसलेले असताना दोन अज्ञात हल्लेखोर दुचाकीवरून आले. त्यांनी क्षणाचाही विलंब न करता जगदीश बिश्नोई यांच्या दिशेने सलग ५ ते ६ गोळ्या झाडल्या. सुदैवाने या हल्ल्यात ते थोडक्यात बचावले. मात्र, या घटनेमुळे पिंपरी-चिंचवडसह संपूर्ण पुणे शहरात भीतीचे वातावरण निर्माण झाले, सगळे हादरले.

या गोळीबारामागची पार्श्वभूमी आणखी धक्कादायक आहे. 7 मे रोजी जगदीश बिश्नोई यांचे भागीदार अशोक कुमार बिश्नोई यांना एका आंतरराष्ट्रीय क्रमांकावरून व्हॉट्सॲप कॉल आला होता. फोनवरून दोन कोटी रुपयांची खंडणी मागण्यात आली होती. पैसे न दिल्यास जीवे मारण्याची धमकी देण्यात आली होती. मात्र, बिश्नोई यानी या कॉलला प्रतिसाद दिला नाही, तेच महागात पडलं. या धमकीकडे दुर्लक्ष करण्यात आल्यानंतरच हा जीवघेणा हल्ला घडवून आणल्याचे समोर आले आहे.

शेकडो सीसीटीव्ही फुटेज तपासून आरोपींना अटक

या गंभीर प्रकरणाच्या तपासासाठी पोलीस आयुक्त विनय कुमार चौबे यांच्या आदेशानुसार सात विशेष पथके तयार करण्यात आली. गुंडा विरोधी पथक आणि गुन्हे शाखा युनिट-२ यांनी तब्बल 350 ते 400 सीसीटीव्ही फुटेजची तपासणी केली. तांत्रिक विश्लेषण आणि गुप्त माहितीच्या आधारे आरोपींचा माग काढत पोलिसांनी प्रथम हरियाणा आणि त्यानंतर उत्तराखंडमधील हरिद्वार येथे धाड टाकली. हरिद्वारमधील एका लॉजमधून तिन्ही शूटरना अटक करण्यात आली.

सिद्धू मूसेवाला हत्याकांडातील आरोपीचाही सहभाग

चौकशीदरम्यान आरोपींकडून अनेक धक्कादायक माहिती समोर आली. हा हल्ला बिश्नोई गँगशी संबंधित आरजू बिश्नोई, शुभम लोणकर आणि कुलदीप उर्फ कशीश यांच्या सूचनेवरून करण्यात आल्याचे आरोपींनी कबूल केले. विशेष म्हणजे, कुलदीप उर्फ कशीश हा प्रसिद्ध पंजाबी गायक सिद्धू मूसेवाला हत्याकांडातील आरोपी असल्याचेही स्पष्ट झाले आहे. या टोळीने शूटरना पिस्तुले, काडतुसे, पैसे आणि वाहनांची व्यवस्था करून दिली होती.

तपासात आणखी एक महत्त्वाची बाब समोर आली आहे. बिश्नोई गँगने दिघी परिसरातील ‘वीर फर्निचर’च्या मालकालाही अशाच प्रकारे खंडणीसाठी धमकी दिली होती. त्यामुळे पुण्यातील व्यापारी वर्ग आता बिश्नोई गँगच्या निशाण्यावर असल्याची भीती व्यक्त केली जात आहे.

दरम्यान, न्यायालयाने अटक करण्यात आलेल्या तिन्ही आरोपींना 28 मे 2026 पर्यंत पोलीस कोठडी सुनावली असून, या प्रकरणातील आणखी धागेदोरे शोधण्यासाठी पोलीस तपास सुरू आहे असं पिंपरी चिंचवडच्या सहपोलीस आयुक्तांनी सांगितलं.