पुण्यात खळबळ! कॅबिनेट मंत्र्याच्या PAचा पत्नीवर जिवघेणा हल्ला, भांडण सोडवायला गेलेल्या पोटच्या मुलालाही बॅटने झोडले
या प्रकरणातील संशयित आरोपी एका कॅबिनेट मंत्र्याकडे खासगी स्वीय सहाय्यक तसेच ओएसडी (OSD) म्हणून कार्यरत असल्याची माहिती समोर आली आहे. या प्रकरण पोलिसांचा तपास सुरु आहे.
राज्याच्या एका कॅबिनेट मंत्र्याच्या खासगी स्वीय सहाय्यकाने (PA) आपल्या पत्नीचा गळा आवळून तिला ठार मारण्याचा प्रयत्न केल्याची धक्कादायक घटना उघडकीस आली आहे. ही घटना पुण्यात घडली आहे. विशेष म्हणजे, आईला वाचवण्यासाठी गेलेल्या आपल्या चिमुरड्या मुलालाही या बापाने क्रिकेटच्या बॅटने बेदम मारहाण केली. या घटनेमुळे राजकीय वर्तुळात आणि पुणे शहरात मोठी खळबळ उडाली आहे.
विजय कारंडे असे या संशयित आरोपीचे नाव असून, तो एका कॅबिनेट मंत्र्याकडे खासगी स्वीय सहाय्यक तसेच ओएसडी (OSD) म्हणून कार्यरत असल्याची माहिती समोर आली आहे.
नेमकी घटना काय?
मिळालेल्या माहितीनुसार, ही घटना ३० एप्रिल रोजी पुणे स्टेशन परिसरातील क्वीन्स गार्डन येथील त्यांच्या राहत्या घरी घडली. विजय कारंडे हे घरी असताना मोबाईलवर कोणासोबत तरी चॅटिंग करत होते. पती कोणाशी बोलतोय, याबाबत पत्नीने सहज विचारणा केली. केवळ या साध्या विचारणेचा राग अनावर झाल्याने कारंडे यांनी पत्नीला अश्लील शिवीगाळ करण्यास सुरुवात केली.
रागाच्या भरात कारंडे यांनी पत्नीचा गळा आवळून तिला जीवे मारण्याचा प्रयत्न केला. यावेळी आईला वाचवण्यासाठी त्यांचा लहान मुलगा मध्ये आला असता, संतापलेल्या विजयने मुलालाही सोडले नाही. त्याने चक्क क्रिकेटच्या बॅटने मुलाला बेदम मारहाण केली. या हल्ल्यात पत्नी आणि मुलगा दोघेही जखमी झाले असून, पत्नीवर सध्या एका खासगी रुग्णालयात उपचार सुरू आहेत.
अहिल्यानगरमधून गुन्हा पुण्याकडे वर्ग
या घटनेनंतर पीडित पत्नीने सुरुवातीला अहिल्यानगर (अहमदनगर) येथे धाव घेत तक्रार नोंदवली होती. मात्र, घटनेचे ठिकाण पुणे असल्याने हा गुन्हा आता पुणे पोलिसांकडे वर्ग करण्यात आला आहे. पुण्याच्या कोरेगाव पार्क पोलीस ठाण्यात विजय कारंडे याच्याविरुद्ध गुन्हा दाखल करण्यात आला असून पोलीस या प्रकरणाचा अधिक तपास करत आहेत. पुणे पोलीस आता या प्रकरणाचा तपास घेत आहेत.
