Pune suicide : नोकरी मिळणार नाही, या भीतीनं पुण्यातल्या उच्चशिक्षित तरुणानं उचललं टोकाचं पाऊल; आठव्या मजल्यावरून उडी घेत आत्महत्या
अक्षय अमोल माटेगावकर असे आत्महत्या (Suicide) केलेल्या तरुणाचे नाव आहे. आत्महत्येपूर्वी अक्षयने एक चिठ्ठी लिहिली असून त्यात मला नोकरी मिळणार नाही, मी तुमच्या इच्छा आकांक्षा पूर्ण करू शकत नाही, मी माझे आयुष्य संपवत आहे, असा उल्लेख केला आहे.
पिंपरी चिंचवड : नोकरी मिळणार नाही, या भीतीने उच्चशिक्षित (Educated) तरुणाने आठव्या मजल्यावरून उडी घेत आत्महत्या केली आहे. पुण्याच्या सुसगावमध्ये हा धक्कादायक प्रकार घडला आहे. अक्षय अमोल माटेगावकर असे आत्महत्या (Suicide) केलेल्या तरुणाचे नाव आहे. आत्महत्येपूर्वी अक्षयने एक चिठ्ठी लिहिली असून त्यात मला नोकरी मिळणार नाही, मी तुमच्या इच्छा आकांक्षा पूर्ण करू शकत नाही, मी माझे आयुष्य संपवत आहे, असा उल्लेख केला आहे. ही चिठ्ठी पोलिसांना मिळाली आहे. अक्षय हा कॉम्प्युटर सायन्सच्या चौथ्या वर्षात शिक्षण घेत होता. मात्र अचानक त्याने आज आत्महत्या केली आहे. त्याच्या आत्महत्येमुळे कुटुंबावर दु:खाचा डोंगर कोसळला आहे. ही आत्महत्येची घटना पहाटेच्या सुमारास घडली. हिंजवडी पोलीस (Hinjewadi police) अधिक तपास करीत आहेत.
सिंबायोसिसमध्ये घेत होता शिक्षण
अक्षयने आज पहाटेच्या सुमारास आठव्या मजल्यावरून उडी घेत आत्महत्या केली. अक्षय आई-बाबा आणि बहिणीसह सुसगाव परिसरात राहतो. अक्षय हा कॉम्प्युटर सायन्सच्या चौथ्या वर्षात शिक्षण घेत होता. सिंबायोसिस इन्स्टिट्यूट ऑफ टेक्नॉलॉजीमध्ये तो शिक्षण घेत होता. अचानक त्याने आज आत्महत्या केली, नोकरीचा पर्याय नसल्याने त्याने आत्महत्या केल्याचे पोलिसांनी सांगितले आहे. मी अपयशी ठरलो आहे. तुमच्या इच्छा पूर्ण करू शकलो नाही, असे पत्रात उल्लेख करत अक्षयने आत्महत्या केली. नोकरीच्या भीतीसह आणखी काही कारण आहे का, तो तणावात होता का, या सर्व कारणांचा तपास आता पोलिसांनी सुरू केला आहे.
कुटुंबही उच्चशिक्षित
अक्षयचे वडील अमोल माटेगावकर प्रिन्स्टन ब्लूमध्ये मेकॅनिकल इंजिनिअर आहेत. तसेच इंडिया हेडदेखील आहेत. तर आई मीनल माटेगावकर मुकेश पटेल स्कूल ऑफ टेक्नॉलॉजी मॅनेजमेंट अँड इंजिनिअरिंग कॉलेज, मुंबई येथे सिव्हिल इंजिनिअरिंग डिपार्टमेंटच्या हेड आहेत. तर बहीण आकांक्षा माटेगावकर एमआयटीमध्ये डिझायनिंगच्या शेवटच्या वर्षाला आहे. उच्चशिक्षित आणि सधन कुटुंब असताना अक्षयने आत्महत्या केल्याने हळहळ आणि आश्चर्यही व्यक्त होत आहे.
