पुणे विद्यापीठात अभाविपचा राडा, आंदोलकांवर गुन्हा दाखल, नंतर राज्यपालांचं कुलगुरुंना पत्र
सावित्रीबाई फुले पुणे विद्यापीठात आज मोठा राडा झाला. अखिल भारतीय विद्यार्थी परिषदेच्या कार्यकर्त्यांनी विद्यापीठात जोरदार आंदोलन केलं. यावेळी आंदोलकांनी व्यवस्थापन परिषदेची बैठक उधळून लावली. या आंदोलनाचे व्हिडीओदेखील समोर आले आहेत. या घटनेची दखल आता थेट राजभवानाकडून घेण्यात आली आहे.
पुणे : सावित्रीबाई फुले पुणे विद्यापीठात घडलेल्या राड्याची गंभीर दखल राजभवनाकडून घेण्यात आल्याची माहिती समोर आली आहे. विशेष म्हणजे या राड्याप्रकरणी अखिल भारतीय विद्यार्थी परिषदेच्या 15 ते 20 आंदोलकांवर गुन्हा दाखल करण्याची माहिती नुकतंच समोर आलेलं. त्यानंतर राजभवनाकडून या घटनेची गंभीर दखल घेण्यात आल्याची माहिती समोर आली आहे. अभाविपने विद्यापीठात घातलेला राडा आणि रॅप साँग प्रकरणाचा तात्काळ अहवाल सादर करण्याचे निर्देश राजभवनाने दिले आहेत.
महाराष्ट्राचे राज्यपाल रमेश बैस यांनी या प्रकरणी विद्यापीठाच्या कुलगुरुंना पत्र पाठवलं आहे. या पत्रात संबंधित प्रकरणाचा अहवाल सादर करण्यात आदेश देण्यात आले आहेत. त्यानंतर पुणे विद्यापीठ उद्या दुपारपर्यंत राजभवनला अहवाल सादर करणार आहे. विशेष म्हणजे याबाबत ‘टीव्ही 9 मराठी’ने प्रदर्शित केलेल्या बातमीची दखल राजभवनाकडून घेण्यात आली आहे.
नेमकं प्रकरण काय?
सावित्रीबाई फुले विद्यापीठात अश्लील गाण्याचं चित्रीकरण करण्यास परवानगी दिल्याच्या निषेधार्थ आज अखिल भारतीय विद्यार्थी परिदषदेच्या कार्यकर्त्यांनी विद्यापीठात जोरदार आंदोलन केले. अभाविपच्या कार्यकर्त्यांनी व्यवस्थापन परिषदेच्या बैठकीत घुसून जोरदार घोषणाबाजी केली. त्यानंतर या आंदोलकांनी कागदपत्रे फाडून ते उधळतानाच विद्यापीठातील दरवाजे आणि खिडक्यांच्या काचाही फोडल्या.
विद्यार्थ्यांनी अचानक केलेल्या या राड्यामुळे विद्यापीठात एकच खळबळ उडाली. राड्यामुळे कुलगुरुंनाही बैठक थांबवावी लागली. तब्बल तासभर या विद्यार्थ्यांचे आंदोलन सुरू होते. पुणे विद्यापीठात आज विद्यापीठ व्यवस्थापनाची बैठक सुरू होती. कुलगुरुंच्या अध्यक्षतेखाली सुरू असलेल्या या बैठकीला सिनेटचे सदस्यही उपस्थित होते. बैठक सुरू असतानाच अचानक घोषणाबाजीचा आवाज आला.
काही कळायच्या आत अभाविपच्या कार्यकर्त्यांची झुंडच्या झुंड बैठकीच्या ठिकाणी शिरली. कुलगुरुंशी कोणतीही चर्चा न करता या आंदोलकांनी तोडफोड करण्यास सुरुवात केली. खिडक्यांच्या काचा फोडल्या. दरवाजाच्या काचा फोडल्या. कागद फाडून तेही उधळले. ही तोडफोड करत असताना आंदोलक जोरदार घोषणाबाजी देत होते. अश्लील गाण्याचं चित्रीकरण करण्यास परवानगी दिल्याच्या निषेधार्थ हे आंदोलन करण्यात आलं. त्यामुळे विद्यापीठात एकच खळबळ उडाली.
आता पुढे काय होणार?
सावित्रीबाई फुले पुणे विद्यापीठाकडून या प्रकरणी अहवाल सादर करण्यात आल्यानंतर राज्यपालांच्या भूमिकेला जास्त महत्त्व असणार आहे. राज्यपाल या प्रकरणी नेमके काय निर्देश देतात ते पाहणं महत्त्वाचं ठरणार आहे. अश्लील गाण्याचं चित्रीकरण करण्यात आल्याप्रकरणी विद्यापीठ प्रशासनाला राज्यपाल जाब विचारतात की, आक्रमक आंदोलन केल्याप्रकरणी अभाविपच्या कार्यकर्त्यांवर कारवाई करण्याचे निर्देश दिले जातात, हे पाहणं आता महत्त्वाचं ठरणार आहे.
