Pune : संभाजीराजे छत्रपतींना पक्षीय राजकारणात अडकवू नका, अन्यथा…; पुण्यात मराठा समन्वयकांनी राजकीय पक्षांना दिला इशारा
संभाजीराजे छत्रपती यांनी राज्यसभेसाठी अपक्ष म्हणूनच निवडणूक लढवावी, असे मराठा संघटनांचे मत आहे. संभाजीराजेंना कोणत्याही राजकीय बेडीत अडकवू नका. तसे केल्यास त्याची किंमत मोजावी लागेल, असा इशाराही राजकीय पक्षांना देण्यात आला आहे.
पुणे : अपक्ष उमेदवारीला विरोध करू नका आणि राजकीय बेडीत अडकवू नका. अन्यथा मराठा समाज तुम्हाला तुमची जागा दाखवणार, असा इशारा मराठा समन्वयक महेश डोंगरे (Mahesh Dongre) यांनी दिला आहे. संभाजीराजे छत्रपती यांच्या अपक्ष उमेवदवारीवरून सध्या राजकीय (Politics) वातावरण तापले आहे. त्यावर विविध पक्षांचे नेते आपल्या प्रतिक्रिया देत आहेत. त्यात आता मराठा समाजातील विविध संघटनांनी आपले मत नोंदवले आहे. मराठा समन्वयकांचा सर्वच राजकीय पक्षांना थेट इशारा पाहायला मिळत आहे. अपक्ष आमदारांनी संभाजीराजेंना (Sambhajiraje Chhatrapati) पाठिंबा द्यावा. 200 मतदारसंघाचा आम्ही सर्व्हे केला आहे. कोणाचा कळस कसा फिरवायचा, हे आम्हाला माहिती आहे, असे मराठा समन्वयक महेश डोंगरे म्हणाले आहेत. संभाजीराजेंच्या अपक्ष लढण्याला मराठा समन्वयकांतर्फे पाठिंबा दर्शविण्यात आला आहे.
शिवसेनेकडून विनंती अमान्य
संभाजी छत्रपती यांनी राज्यसभेसाठी पाठिंबा मिळावा म्हणून मुख्यमंत्री उद्धव ठाकरे यांची भेट घेतली होती. मुख्यमंत्र्यांनी यावेळी त्यांना शिवसेनेत प्रवेश करण्याची अट घातली. मात्र, संभाजीराजेंनी शिवसेना प्रवेशाला नकार दिला. अपक्ष म्हणून पाठिंबा द्या किंवा महाविकास आघाडीचा उमेदवार म्हणून घोषित करा, अशी विनंती संभाजीराजेंनी मुख्यमंत्र्यांना केली होती. मुख्यमंत्री छत्रपती घराण्याचा सन्मान करतील असा मला विश्वास आहे, असेही संभाजीराजे यांनी म्हटले होते. मात्र, शिवसेनेकडूनही ही विनंती अमान्य करण्यात आली. संजय पवार यांना शिवसेनेतर्फे उमेदवारी देण्यात आली. त्यामुळे संभाजीराजे अपक्ष म्हणूनच लढणार, हे स्पष्ट झाले आहे.
Pune : संभाजीराजे छत्रपतींना पक्षीय राजकारणात अडकवू नका, अन्यथा…; पुण्यात मराठा समन्वयकांनी राजकीय पक्षांना दिला इशारा पाहा व्हिडिओ – #sambhajirajechhatrapati #rajyasabhaelection #pune #maheshdongre अधिक बातम्यांसाठी क्लिक करा https://t.co/pJlmGZMLmk pic.twitter.com/UKSq9M3Tpc
— TV9 Marathi (@TV9Marathi) May 25, 2022
मराठा संघटना पाठीशी
संभाजीराजे छत्रपती यांनी राज्यसभेसाठी अपक्ष म्हणूनच निवडणूक लढवावी, असे मराठा संघटनांचे मत आहे. संभाजीराजेंना कोणत्याही राजकीय बेडीत अडकवू नका. तसे केल्यास त्याची किंमत मोजावी लागेल, असा इशाराही राजकीय पक्षांना देण्यात आला आहे. 2024च्या लोकसभा निवडणुकीत मराठा समाज जागा दाखवल्याशिवाय राहणार नाही. त्यामुळे वाढत्या सस्पेंसवरून मराठा समन्वयकांनी आता मौन सोडले आहे.
