Pune : तब्बल 200 जणांवर पोलीस करणार तडीपारीची कारवाई! पुण्यातल्या बारामती, इंदापुरात अवैध धंदे करणाऱ्याचं धाबं दणाणलं
बारामती उपविभागातील सहा पोलीस ठाण्याच्या हद्दीत अवैध हातभट्टीची दारू विकणाऱ्या 20 जणांवर एमपीडीए कायद्यांतर्गत कारवाईसाठी यादी बनविण्यात आली आहे. एकूण 150 दारू विक्रेत्यांवर तडीपारीची कारवाई करण्यात येणार आहे.
बारामती, पुणे : बारामती (Baramati) आणि इंदापूर तालुक्यातील दोनशे जणांवर तडीपारीची कारवाई करण्यात येणार आहे. यासंबंधीचा प्रस्ताव लवकरच सादर करण्यात येणार असल्याची माहिती उपविभागीय पोलीस अधिकारी गणेश इंगळे यांनी दिली आहे. अवैध दारू विक्री प्रकरणांमध्ये सहभागी असलेल्या व्यक्तींची कुंडली पोलिसांनी तयार केली असून यापुढील काळात अवैध व्यवसाय (Illegal activity) करणाऱ्यांविरुद्ध पोलीस कठोर कारवाई करणार आहेत. त्याअंतर्गत या दोनशे जणांवर तडीपारीचा प्रस्ताव तयार करण्याचे काम सध्या सुरू आहे. बारामती तालुक्यातील वडगाव निंबाळकर पोलीस ठाण्याच्या हद्दीतील निंबुत येथे गेल्या अनेक वर्षांपासून अवैध दारू (Liquor) विक्री करणाऱ्या प्रकाश चैनसिंग नवले याच्याविरोधात पुण्याच्या जिल्हाधिकाऱ्यांनी एमपीडीए कायद्याअंतर्गत कारवाई केली आहे. दरम्यान, या कारवाईमुळे अवैध धंदे करणाऱ्यांचे धावे दणाणले आहे.
प्रकाश चैनसिंग नवलेवर 25 गुन्हे दाखल
प्रकाश चैनसिंग नवले याला या कायद्यान्वये एक वर्षासाठी स्थानबद्ध करण्याचे आदेश जिल्हाधिकाऱ्यांनी पोलिसांना दिल्याची माहिती उपविभागीय पोलीस अधिकारी गणेश इंगळे यांनी दिली आहे. वडगावचे सहायक पोलीस निरीक्षक सोमनाथ लांडे यांनी नवले याच्याविरोधातील प्रस्ताव तयार केला होता. नवले याच्यावर वडगाव निंबाळकर पोलीस ठाण्यात 25 गुन्हे दाखल आहेत. हा प्रस्ताव जिल्हा पोलीस अधीक्षक डॉ. अभिनव देशमुख यांच्याकडून मंजुरीसाठी जिल्हाधिकाऱ्यांकडे पाठविण्यात आला होता. त्यास जिल्हाधिकाऱ्यांनी मंजुरी देत नवले याला स्थानबद्ध करण्याचे आदेश दिले. वडगाव निंबाळकर पोलिसांनी नवले याला येरवडा कारागृहात दाखल केले.
150 दारू विक्रेत्यांवर तडीपारीची कारवाई
बारामती उपविभागातील सहा पोलीस ठाण्याच्या हद्दीत अवैध हातभट्टीची दारू विकणाऱ्या 20 जणांवर एमपीडीए कायद्यांतर्गत कारवाईसाठी यादी बनविण्यात आली आहे. एकूण 150 दारू विक्रेत्यांवर तडीपारीची कारवाई करण्यात येणार आहे. सहायक पोलीस निरीक्षक लांडे यांच्यासह उपनिरीक्षक योगेश शेलार, सलीम शेख, हवालदार महेश बनकर, रमेश नागटिळक, दीपर वारुळे, अमोल भोसले, नितीन बोराडे, महादेव साळुंके, पोपट नाळे, अमोल भुजबळ, प्राजक्ता जगताप यांच्या पथकाने एमपीडीए कायद्यांतर्गत प्रस्ताव तयार केला.
