चार महिन्यांचं बाळ घेऊन परीक्षा द्यायला गेली, परीक्षा केंद्राबाहेर बाळाचं रडू थांबेना, मग…

अभिजित पोटे, TV9 मराठी, प्रतिनिधी, पुणे : कोण कसा कुणाच्या मदतीला धावून येईल, काही सांगता येत नाही. पुण्यात परीक्षेसाठी गेलेल्या आईचं चार महिन्यांचं बाळ बाहेर वडिलांजवळ रडत होतं. महिला पोलीस कर्मचारी तेथं तैनात होत्या. त्यांनी त्या चार महिन्यांच्या बाळाला जवळ घेत मायेची ऊब दिली. परीक्षा केंद्राबाहेर दोन तास बाळाला खेळण्यात गुंतवून ठेवलं. पोलिसाची ड्यूटी करत असताना आईची भूमिका पार पाडली. या महिला पोलिसाचं सर्वत्र कौतुक होत आहे.

पुण्यात काल पुणे महापालिकेच्या काही पदांसाठी भरती प्रक्रियेची परीक्षा पार पडली. बुधवारी पार पडलेल्या या परीक्षेत रामटेकडी येथील परीक्षा केंद्रावर एक वेगळे दृश्य पाहायला मिळालं. या परीक्षा केंद्रावर अनेक महिला देखील परीक्षा देण्यासाठी आल्या होत्या.

त्यात काही महिला गरोदर तर काही नुकत्याच जन्मलेल्या आपल्या लहान बाळाला घेऊन परीक्षेसाठी आल्या होत्या. याच परीक्षा केंद्रावरून आता एका लहान बाळाचा आणि एका महिला पोलीस कर्मचाऱ्यांचा व्हिडिओ सोशल मीडियावर मोठ्या प्रमाणात व्हायरल होत आहे.

एक महिला परीक्षा देण्यासाठी आपली अवघी चार महिन्याचे बाळ घेऊन दुपारी परीक्षा केंद्रावर आली होती. परीक्षा केंद्रात परीक्षांची शिवाय कुणालाही प्रवेश नसल्याने तिला तिचे बाळ बाहेरच ठेवावे लागले.

आपल्या नवऱ्याजवळ बाळ देऊन ती महिला परीक्षा देण्यासाठी आत गेली. वडील आपल्या बाळाला घेऊन बाहेर थांबले असताना त्या बाळाने रडायला सुरुवात केली. त्या बाळाचे रडणं वडिलांना देखील थांबवता येत नव्हतं.

तेव्हा परीक्षा केंद्रावर असणाऱ्या महिला पोलीस अधिकारी आणि कर्मचाऱ्यांनी त्या बाळाला आपल्या कुशीत घेतलं. त्याला खेळवत शांत करण्याचा प्रयत्न केला. त्याच्या आईची परीक्षा संपेपर्यंत त्या बाळाला मायेची ऊब देण्याचा प्रयत्न देखील त्या महिला पोलीस कर्मचाऱ्यांनी केला.

ड्युटीवर असताना देखील त्या महिला पोलीस कर्मचाऱ्यांनी त्या बाळाला सांभाळलं. तिच्या याच मायाळू पणाचा व्हिडिओ आता सोशल मीडियावर मोठ्या प्रमाणात व्हायरल होताना पाहायला मिळत आहे.