देवेंद्र फडणवीस यांना रोखण्यासाठी मोठी खेळी, थेट भस्मासूर.. सुषमा अंधारे यांचा खळबळजनक दावा..

शिवसेना ठाकरे गटाचे 6 खासदार वेगळा गट निर्माण करत आहेत. हे सर्व खासदार दिल्लीत आहेत. लोकसभा अध्यक्ष ओम बिर्ला यांची भेट एकनाथ शिंदे यांनी काल रात्री उशिरा राजस्थानमध्ये घेतली. त्यानंतर एकनाथ शिंदे ठाकरेंच्या खासदारांसोबत बैठक घेणार आहेत. त्यानंतर सर्वजण मिळून लोकसभा अध्यक्ष ओम बिर्ला यांना पत्र देतील. दिल्लीमध्ये प्रचंड घडामोडी घडताना दिसत आहेत. हे खासदार काल दुपारीच दिल्लीत दाखल झाले. शिवसेना ठाकरे गट पुन्हा एकदा फुटणार असल्याची सूत्रांची माहिती आहे. हा उद्धव ठाकरे यांना मोठा धक्का आहे. 19 जूनला हे सर्व खासदार शिवसेना शिंदे गटात प्रवेश करतील. या खासदारांना उपमुख्यमंत्री एकनाथ शिंदे यांच्याकडून काही आश्वासन देण्यात आल्याची माहिती आहे. त्यापैकी एक म्हणजे यांना 2029 ला यांनाच तिकिट दिले जाईल. यांच्या मतदार संघाला मोठा निधी दिला जाईल.

यासोबतच मराठवाड्यातील एका खासदाराला मंत्रीपदही देण्याचे आश्वासन देण्यात आल्याचे सूत्रांनी सांगितले. यादरम्यानच या खासदारांच्या फुटीवर शिवसेना ठाकरे गटाच्या नेत्या सुषमा अंधारे यांनी अत्यंत मोठा दावा केला. देवेंद्र फडणवीस हे दिल्लीत जाऊ नये, याकरिता भाजपाच्या नेत्यांकडून प्रयत्न सुरू आहेत. फडणवीसांनी CM पदासाठी एक भस्मासूर जन्माला घातल्याचाही त्यांनी आरोप केला.

सुषमा अंधारे यांनी म्हटले की, देवेंद्र फडणवीस तुमच्या एका मुख्यमंत्रि‍पदासाठी तुम्ही एक भस्मासूर जन्माला घातला. आता भस्मासूराची ताकद ऐवढी वाढली की, तुमच्या डोक्यावर हात ठेवायला कमी करणार नाही, इथपर्यंत हात सरसावले आहेत. फडणवीसांच्या दिल्लीत जाण्याच्या महत्वाकांक्षा लपून राहिलेल्या नाहीत. फडणवीसांनी दिल्लीत पोहोचू नये, म्हणून फडणवीसांच्याच पक्षातले दिल्लीतील नेते फडणवीस दिल्लीत पोहोचू नये, याकरिता लांबसडक स्पीड ब्रेकर टाकण्याच्या तयारीत आहेत. अगदी दिल्ली टू दरे..

सुषमा अंधारे यांनी नाव न घेता एकनाथ शिंदे यांच्यावर टीका केली आहे. अप्रत्यक्षपणे त्यांनी एकनाथ शिंदे यांना भस्मासूर म्हटले आहे. 6 खासदारांच्या फुटीदरम्यान सुषमा अंधारे यांच्याकडून हे भाष्य करण्यात आले. राज्यातील राजकारणात पुढच्या काही तासात मोठ्या घडामोडी घडताना दिसत आहेत.