महाराष्ट्राला संजय राऊत यांची गरज, कारण त्यांच्यामुळे… मुख्यमंत्री एकनाथ शिंदे यांचे चिरंजीव श्रीकांत शिंदे यांचं मोठं विधान
मला राऊत साहेबांची खूप काळजी वाटते. त्यांच्याबद्दल मला खूप सहानुभूती आहे. रोज सकाळी उठून कुणावरही ते आरोप करतात. मी एक डॉक्टर आहे. त्यामुळे त्यांच्या वागणुकीकडे पाहून मला वाटतं की, सिझोफ्रेनिया सारखा आजार त्यांना होतोय का?
अंबरनाथ : मुख्यमंत्री एकनाथ शिंदे यांचे चिरंजीव खासदार श्रीकांत शिंदे यांनी आपल्याला मारण्यासाठी राजा ठाकूर याला सुपारी दिल्याचा गंभीर आरोप ठाकरे गटाचे नेते संजय राऊत यांनी केला होता. राऊत यांनी गृहमंत्री आणि पोलीस आयुक्तांनाही तसं पत्रं पाठवलं होतं. त्यामुळे एकच खळबळ उडाली होती. या प्रकरणी राजा ठाकूर याच्या पत्नी पूजा ठाकूर यांनी संजय राऊत यांच्याविरोधात पोलिसात तक्रारही नोंदवली होती. परंतु, श्रीकांत शिंदे यांनी त्यावर अद्याप प्रतिक्रिया दिली नव्हती. तब्बल दोन दिवसानंतर श्रीकांत शिंदे यांनी अखेर या प्रकरणावर मौन सोडलं आहे. आजारी असल्यामुळे श्रीकांत शिंदे हे प्रतिक्रिया देऊ शकले नव्हते.
माझ्यावरील आरोप हा हास्यास्पद प्रकार आहे. नरेश म्हस्के पुराव्यासकट बोलले आहेत. संजय राऊत यांचे सहकारी चिंदरकर यांचाही जबाब पोलिसांनी घेतला. आधी राऊत म्हणाले जीवे मारायची सुपारी दिली. मग जबाब दिला काळे फासणार आहेत. हे चिंदरकर यांनी सांगितल्याचं म्हणाल्यामुळे त्यांचा जबाब पोलीसांनी घेतला. मी कुणाचं नाव घेतलं नाही, असं चिंदरकरांनी आपल्या जबाबात म्हटलं होतं. त्यामुळे दोन्ही जबाबात विरोधाभास आहे, असं श्रीकांत शिंदे म्हणाले.
महाराष्ट्राची करमणूक होते
मला राऊत साहेबांची खूप काळजी वाटते. त्यांच्याबद्दल मला खूप सहानुभूती आहे. रोज सकाळी उठून कुणावरही ते आरोप करतात. मी एक डॉक्टर आहे. त्यामुळे त्यांच्या वागणुकीकडे पाहून मला वाटतं की, सिझोफ्रेनिया सारखा आजार त्यांना होतोय का? काल्पनिक, आभासी विश्वात ते राहतायत. महाराष्ट्राला संजय राऊत यांनी गरज आहे, कारण सकाळी त्यांच्यामुळे महाराष्ट्राची करमणूक होते. त्यामुळे त्यांनी तब्येतीची काळजी घ्यावी, असा खोचक टोला श्रीकांत शिंदे यांनी लगावला.
राऊतांविरोधात आंदोलन
दरम्यान, श्रीकांत शिंदे यांच्यावर राऊत यांनी केलेल्या आरोपानंतर शिवसैनिक चांगलेच संतापले आहेत. या शिवसैनिकांनी राऊत यांच्याविरोधात जोरदार निदर्शने केली आहेत. मुंबईच्या अंधेरी पश्चिम रेल्वे स्थानकाजवळ राऊत यांच्याविरोधात शिवसेना कार्यकर्त्यांनी जोड़ मारो आंदोलन केलं. या आंदोलनादरम्यान शिवसेनेच्या कार्यकर्त्यांनी संजय राऊत यांच्या फोटोला चप्पल आणि बूटांचा हार घातला. त्यानंतर या फोटोला चप्पल आणि बुटाने मारलं. त्यानंतर राऊत यांचा निषेधही नोंदवण्यात आला.
एवढेच नाही तर राऊत यांच्या विरोधात घोषणाबाजी करताना शिवसेना कार्यकर्त्यांनी राऊत यांनी खासदार श्रीकांत शिंदे यांच्यावर खोटे आरोप केले आहेत, संजय राऊत यांच्यावर कारवाई करावी, अशी मागणी केली. आंदोलनानंतर शिवसेनेच्या कार्यकर्त्यांनी डीएन नगर पोलीस ठाण्यात जाऊन राऊत यांच्याविरोधात लेखी तक्रार देऊन कारवाईची मागणी केली.
राऊत हे स्वत: सुपरीबाज आहेत. जामिनावर बाहेर आलेला माणूस आहे, उद्धव ठाकरेंनी संजय राऊत यांना बाजूला केले पाहिजे. राऊत हे संपलेले लाडू आहेत, त्यांना कचराकुंडीत फेकून द्या, अशी मागणी या शिवसैनिकांनी केली.