Gyanu! It’s done bro : ग्यानू डन ब्रो… एक बिस्कीट दो चाय, ज्ञानेश कुमार बाय बाय… जेनजींच्या घोषणांनी शिवाजी पार्क सोडलं दणाणून…

दादरच्या शिवाजी पार्कात आज भलं मोठं वादळ आलं. हे वादळ वाऱ्यावावधाणाचं नव्हतं, रिमझिम सरींचं नव्हतं. तर हे वादळ होतं कॉकरोचचं. तरुणाईचं. जेनजीचं. या तरुणाईने आज शिवाजी पार्क मैदानाला हिरवपण दिलं. बऱ्याच वर्षानंतर शिवाजी पार्क मैदानाने कात टाकली. सळसळता उत्साह पाहायला मिळाला. जिवंतपणा जाणवला. जेनजींच्या अनोख्या आणि त्यांच्या जनरेशनच्या घोषणांनी या शिवाजी पार्काच्या कणकणात प्राण फुंकले गेले. ग्यानू डन ब्रो…च्या घोषणांनी शिवाजी पार्कचा आसमंत चिरला गेला. एक बिस्कीट दो चाय, ज्ञानेश कुमार बाय बाय…च्या घोषणेने तर हाकेच्या अंतरावर असलेला अरबी समुद्रही ढवळून निघाला. आजच्या मोर्च्याने चळवळ जिवंत असल्याचा पुन्हा फिल आला.

अभिजीत दीपके यांच्या नेतृत्वात शिवाजी पार्कात आज जेनजींनी एल्गार पुकारला. निवडणुकीतील कथित घोटाळया प्रकरणी मुख्य निवडणूक आयुक्त ज्ञानेश कुमार यांनी राजीनामा देण्यासाठी हा मोर्चा काढण्यात आला होता. या मोर्चाला अभिनेत्री शबाना आजमी आणि संगीतकार विशाल ददलानी उपस्थित होते. ठाकरे गटाचे प्रतिनिधी उपस्थित होते. दुपारपासूनच शेकडो जेनजींनी शिवाजी पार्कात ठाण मांडलं होतं. हातात तिरंगा घेऊन ज्ञानू, डन ब्रोच्या घोषणा देत हे तरुण शिवाजी पार्कात जमले होते.

जोर से बोलो, गो ज्ञानू गो…

यावेळी जेनजींनी त्यांच्या जनरेशनच्या भाषेतील घोषणा दिल्या. संपूर्ण परिसर दणाणून सोडला. ग्यानू मस्ट गो…, ग्यानू डन ब्रो…, एक बिस्किट दो चाय, ग्यानेश कुमार बाय बाय…, धर्मेंद्र प्रधान झांकी है, ज्ञानेश कुमार बाकी है…. जोर से बोलो, गो ज्ञानू गो…, एक कचोरी, दो समोसा… ज्ञानू पर नही भरोसा… आदी घोषणांनी तरुणांनी संपूर्ण परिसर दणाणून सोडला. या सरकारचं करायचं काय, खाली डोकं वर पाय… अशा मराठी घोषणाही देण्यात आल्या. त्यामुळे संपूर्ण शिवाजी पार्क परिसर दणाणून गेला होता.

जय भीम… जय शिवाजी…

जय जय जय जय जयभीम… जयभीम जयभीम…, जोर से बोलो जयभीम… जय भवानी, जय शिवाजी…, छत्रपती शिवाजी महाराज की जय…, छत्रपती संभीजी महाराज की जय…, भारत माता की जय…. वंदे मातरम… वंदे मातरम… आदी घोषणाही तरुणांनी दिल्या.