कॉक्रोच जनता पार्टीचं आंदोलन चिघळलं; काही आंदोलक पोहोचले संसद भवनाच्या परिसरात

कॉक्रोच जनता पार्टीचं आंदोलनातील आंदोलकांनी आक्रमक पवित्रा घेतला आहे. आंदोलक पोलिसांच्या अडवणुकीनंतरही संसदकडे जाऊ लागले आहेत. संसद परिसरात येण्यास रोखण्यासाठी पोलिसांनी आंदोलकांवर अश्रूधुरांच्या नळकांड्या फोडल्या. त्यानंतरही आंदोलक संसदेकडे आगेकुच करत आहे. काही आंदोलक हे संसद परिसरात देखील पोहोचले आहेत. संसद परिसरात पोहोचून सरकारविरोधात आंदोलन करत आहे. आंदोलकांनी संसद परिसरात शिरकाव केल्याने पोलीस आणखी अलर्ट झाले आहेत.

आंदोलक संसद भवन परिसरात 

कॉक्रोच जनता पार्टीच्या अभिजीत दीपके यांच्यासहित इतर तीन विद्यार्थ्यांनी देखील उपोषण सोडलं आहे. सर्व विद्यार्थी आणि आंदोलक संसद परिसरात पोहोचू लागले आहेत. परंतु त्यांना रोखण्यासाठी पोलीस फौजफाटा तैनात करण्यात आला आहे. संसदेचा मुख्य प्रवेशद्वार देखील बंद करण्यात आला आहे. काही आंदोलक संसदेपासून अवघ्या 150 मीटर अंतरावर आहे. यामुळे पोलिसांच्या व्यतिरिक्त निमलष्करी दलाच्या जवानांना देखील तैनात करण्यात आल्याचं दिसत आहे.

संसद परिसरात पोहोचलेल्या आंदोलकांना पांगवण्यासाठी पोलिसांनी आंदोलकांवर अश्रूधुराच्या नळकांड्या फोडण्यास सुरुवात केली आहे. तर दुसरीकडे केंद्रीय शिक्षणमंत्री धर्मेंद्र प्रधान हे केंद्रीय गृहमंत्री अमित शाह यांना भेटण्यासाठी पोहोचले आहेत. सरकार त्यांच्याशी संवाद साधत आहेत, असं कॉक्रोच जनता पार्टीचा दावा आहे. आंदोलनाच्या पार्श्वभूमीवर अभिजीत दीपके यांनी उपोषण देखील सोडलं आहे. परंतु पर्यावरण कार्यकर्ते सोनम वांगचुक हे अद्याप उपोषणावर ठाम आहेत.

पोलिसांकडून आंदोलकांची समजूत काढण्याचा प्रयत्न  

बॅरिकेट्स लावले असतानाही आंदोलक संसदेच्या दिशेने जात आहेत. काही आंदोलकांनी बॅरिकेट्स देखील पाडले आहेत. आंदोलन चिघळल्याने मेट्रो स्टेशन देखील बंद करण्यात आलं आहे. नवी दिल्ली परिसरात मोठ्या संख्येने तरुण जमल्याचे पाहायला मिळत आहे. पोलिसांचा मोठा बंदोबस्त असतानाही संसद परिसरात आंदोलक सरकारच्या विरोधात आंदोलन करत आहे. आंदोलकांनी आक्रमक पवित्रा घेतल्याने पोलीस दलातील वरिष्ठ अधिकारी देखील घटनास्थळी पोहोचले आहेत. पोलिसांकडून आंदोलकांची समजूत काढण्याचा प्रयत्न करत आहे. त्यानंतरही विद्यार्थी आंदोलनावर ठाम आहेत.