CJP Protest Delhi : अभिजित दीपकेंच्या दाव्याने एकच खळबळ, वागंचूक यांच्या पत्नीला पोलिसांनी…दिल्लीच्या आंदोलनात काय घडलं?
पोलीस आमच्यावर कारवाई का करत आहेत, तेच आम्हाला कळत नाहीये. आम्ही इथे शांतपणे बसलेलो आहोत. जोपर्यंत बैठक होत नाही, तोपर्यंत आम्ही इथेच थांबू असे आम्ही पोलिसांना सांगत आहोत. तरीदेखील पोलीस ऐकत नाहीयेत. मुलांची डोके फोडली आहेत, असा आरोप अभिजित दीपके यांनी केला.
Delhi Jantar Mantar Protest : कॉकरोच जनता पार्टीतर्फे दिल्लीमध्ये मोठे आंदोलन छेडण्यात आले आहे. सीजेपीकडून केंद्रीय शिक्षणमंत्री धर्मेंद्र प्रधान यांचा राजीनामा मागितला जात आहे. गेल्या 22 दिवसांपासून सामाजिक कार्यकर्ते सोनम वांगचूक यांचे उपोषण सुरू होते. सीजेपीचे संस्थापक अभिजित दीपके यांच्याकडूनही उपोषण चालू होते. आता हे उपोषण संपलेले असून संसद मार्चची घोषणा करण्यात आली आहे. देशभरातून आंदोलक दिल्लीमध्ये पोहोचले असून संसदेकडे कूच करत आहेत. हजारो आंदोलकांवर नियंत्रण मिळवण्यासाठी दिल्लीमध्ये शेकडो पोलिसांचा फौजफाटा तैनात करण्यात आला आहे. असे असतानाच आता सीजेपीचे संस्थापक अभिजित दीपके यांनी मोठा दावा केला आहे. सोनम वांगचूक यांच्या पत्नीवर पुरुष पोलिसांनी लाठीचार्ज केला आहे. त्यांच्या केसांना ओढून त्यांना खाली खेचण्याचा प्रयत्न करण्यात आला, असा दावा दीपके यांनी केलाय.
सोनम वांगचूक यांच्या पत्नीचे केस पकडून…
दीपके यांनी टीव्ही 9 मराठीशी बातचित केली. यावेळी बोलताना त्यांनी पोलिसांची गुंडागर्दी चालू आहे, असा आरोप केला. तसेच सरकारकडून जोपर्यंत काही सांगितले जात नाही, तोपर्यंत आमचे हे आंदोलन चालूच राहील, असं ठणकावून सांगितलं आहे. सोनम वांगचूक यांच्या पत्नीवर पोलिसांनी लाठीचार्ज करण्याचा प्रयत्न केला. एका पुरुष पोलिसाने महिलेवर लाठीचार्ज केला आहे. सोनम वांगचूक यांच्या पत्नीचे केस पकडून त्यांना ट्रकच्या खाली खेचण्याचा प्रयत्न केला. आम्ही पोलिसांना अडवले. असं का करताय, हे विचारलं. सोनम वांगचूक यांच्या पत्नीसोबत तुम्ही असं कसं वागू शकता, असा जाब आम्ही त्यांना विचारला. उत्तर देताना थांबा तुमच्या सगळ्यांचीच मस्ती काढतो, असं आम्हाला पोलीस अधिकारी म्हणाला, अशी माहिती यावेळी दीपके यांनी दिली.
लढा आणखी तीव्र केला जाणार
तसेच, पोलीस आमच्यावर कारवाई का करत आहेत, तेच आम्हाला कळत नाहीये. आम्ही इथे शांतपणे बसलेलो आहोत. जोपर्यंत बैठक होत नाही, तोपर्यंत आम्ही इथेच थांबू असे आम्ही पोलिसांना सांगत आहोत. तरीदेखील पोलीस ऐकत नाहीयेत. मुलांची डोके फोडली आहेत. मुलींवरही पुरुष पोलीस अधिकाऱ्यांनी लाठीचार्ज केलेला आहे. आम्ही शांतपणे बसून राहणार आहोत. आमचे आंदोलन इथेच असेल, असे सांगत लढा आणखी तीव्र केला जाईल, असं सूचित केलं. सरकारकडून जोपर्यंत काही सांगितले जात नाही. तोपर्यंत हे आंदोलन असेच चालू राहील. गुंडगिरी चालू आहे, असा हल्लाबोलही त्यांनी केला. त्यामुळे या आंदोलनामध्ये पुढे काय होणार, हे पाहणे महत्त्वाचे ठरणार आहे.
