नव्या वर्षाच्या पहिल्याच दिवशी मोठी दुर्घटना; नर्सिंग होमला भीषण आग, दोघांचा होरपळून मृत्यू, अनेकजण अडकले
तासा दीडतासाच्या प्रयत्नानंतर अग्निशमन दलाने आगीवर नियंत्रण मिळवलं आहे. मात्र, अजूनही आगीच्या ज्वाळा निघताना दिसत असून धूरही निघत आहे. लवकरच ही आग पूर्णपणे विझवली जाणार आहे.
नवी दिल्ली: नव्या वर्षाच्या पहिल्याच दिवशी नवी दिल्लीत मोठी दुर्घटना घडली आहे. येथील एका नर्सिंग होमला आज सकाळीच भीषण आग लागली. ही आग अत्यंत भीषण होती. बघता बघता आगीचं तांडव झालं. त्यामुळे एकच हाहाकार माजला. रुग्णालयातील कर्मचारी आणि रुग्णांची एकच धावपळ उडाली. या आगीत दोघांचा होरपळून मृत्यू झाला आहे. तर आगीत अनेकजण अडकले असून त्यांची सुटका करण्यात येत आहे. अग्निशमन दलाने आतापर्यंत सहा जणांची सुटका केली आहे. अजून काही लोकांची सुटका करण्यात येत असून आगीवर नियंत्रण मिळवण्यात आले आहे. आधी भूकंपाचे धक्के आणि आता आग लागल्याने दिल्लीकरांमध्ये भीतीचं वातावरण पसरलं आहे.
आज पहाटे सव्वा पाच वाजता ग्रेटर कैलाश-2मधील सीनियर सिटीजन केअर होम या नर्सिंग होमला ही आग लागली. पहाटे सर्वचजण झोपेत होते. नर्सिंगमधला स्टाफ आणि रुग्णही झोपेत होते. त्यावेळी आग लागल्याने सुरुवातीला कुणाला काहीच कळलं नाही. मात्र, जसजशी आग तीव्र होत गेली आणि गरम वाफा येऊ लागल्याने रुग्णालयात एकच खळबळ उडाली.
रुग्णालयातील स्टाफ आणि रुग्णांनी एकच आक्रोश करत धावपळ सुरू केली. जो तो आपला जीव वाचवण्यासाठी पळू लागला. त्यामुळे अनेकांना पळता पळता मारही लागला. तर या आगीत दोन जणांचा होरपळून मृत्यू झाला आहे. अनेकांना मारही लागला आहे.
आगीच्या घटनेची माहिती मिळताच अग्निशमन दलाने घटनास्थळी धाव घेऊन आग विझवण्याचा प्रयत्न सुरू केला. दुसरीकडे अग्निशमन दलाच्या काही जवानांनी लोकाना वाचवण्याचा प्रयत्नही सुरू केला. आतापर्यंत सहा लोकांची सुटका करण्यात आली आहे.
ही आग अत्यंत भीषण होती. कडाक्याची थंडी आणि गार हवा यामुळे आगीने लगेच पेट घेतला. वाऱ्याच्या वेगाने आगही पटकन पसरली. त्यामुळे सर्वत्र अग्नितांडव झालं. धूर आणि आगीचे लोळ पाहून आजूबाजूचे लोकही धास्तावले. काही लोकांनी आग विझवण्याचा प्रयत्न केला.
दरम्यान, तासा दीडतासाच्या प्रयत्नानंतर अग्निशमन दलाने आगीवर नियंत्रण मिळवलं आहे. मात्र, अजूनही आगीच्या ज्वाळा निघताना दिसत असून धूरही निघत आहे. लवकरच ही आग पूर्णपणे विझवली जाणार आहे. त्यानंतर कुलिंग ऑपरेशन करण्यात येणार आहे. सध्या आग पूर्णपणे विझवण्याबरोबरच रुग्णालयात सर्च ऑपरेशन सुरू करण्यात आलं आहे.