पंतप्रधान नरेंद्र मोदी जैश-ए-मोहम्मदच्या टार्गेटवर? NIAचा मोठा गौप्यस्फोट

संदीप राजगोळकर, TV9 मराठी, नवी दिल्ली : NIAने पंतप्रधान नरेंद्र मोदी (Narendra Modi) यांच्या जम्मू काश्मीर दौऱ्याबाबत महत्त्वपूर्ण खुलासा केलाय. एप्रिल महिन्यात झालेल्या या दौऱ्याला जैश-ए-मोहम्मदने (JeM) टार्गेट केलं होतं, असा खळबळजनक गौप्यस्फोट एनआयएने (NIA) केलाय. जैशचा म्होरक्या मसूद अजहर यानेच हा कट रचला होता, असंही एनआयएने म्हटलं आहे. त्यामुळे जैशच्या हिटलिस्टवर पंतप्रधान नरेंद्र मोदी यांचं नाव असल्याचं पुन्हा एकदा अधोरेखित झाल्याचं पाहायला मिळतंय.

याच वर्षी एप्रिल महिन्यात मोदी जम्मू काश्मीरच्या दौऱ्यावर होते. त्यावेळी झालेल्या चकमकीबाबत चौकशी करण्यात आली. या चौकशीतून धक्कादायक माहिती उघडकीस आलीय. 24 एप्रिल रोजी पंतप्रधान नरेंद्र मोदी जम्मू काश्मीरच्या दौऱ्यावर होते.

मोदींच्या दौऱ्याच्या 48 तास आधी म्हणजे 21 आणि 22 एप्रिलच्या दरम्यान अतिरेकी आणि सैन्य दलाच्या जवानांमध्ये चकमक झाली होती. या चकमकीत चार अतिरेक्यांना कंठस्थान घालण्यात आलं होतं. तर एक जवान शहीद झाला होता. तर 4 जवान जखमी झालेले.

या चकमकीप्रकरणी आरोपपत्र दाखल करण्यात येणार आहे. 12 अतिरेक्यांविरोधात हे आरोपपत्र तयार करण्यात आलंय. जम्मूत झालेल्या चकमकीच्या पार्श्वभूमीवर एक गुप्त रिपोर्ट समोर आला आहे. या रिपोर्टमध्ये एका चक्रव्युहाचा उल्लेख करण्यात आला आहे.

हा कट खुद्द मसूद अजहर यानेच रचला होता, अशीही माहिती समोर येतेय. मोदींच्या रॅलीआधी जैशच्या 6 अतिरेक्यांनी जम्मूमध्ये सीआयएसएफच्या बसवर हल्ला चढवला होता. यावेळी झालेल्या चकमकीत दोघा अतिरेर्यांचा खात्मा करण्यात आला होता.

मोदींच्या होणाऱ्या रॅलीवरही अतिरेक्यांचा निशाणा होता. या अतिरेक्यांनी रॅलीत सहभागी होणाऱ्या संरपंचांसह पंचांवरही हल्ला करण्याचा कट आखला होता. तसं प्लॅनिंगही करण्यात आलं होतं. ही रॅली होऊच नये, यासाठी हा कट रचला गेला होता, अशी माहिती समोर आलीय. याप्रकरणाचा प्राथमिक तपास पोलिसांनी केला होता. त्यानंतर त्याचा अहवाल हा एनआयएकडे सोपवला होता.