प्रभू रामाने सीतेचा त्याग केला, मी राम मंदिरात कसा जाऊ?, माजी क्रिकेटपटू, खासदार कीर्ती आझाद यांचा सवाल

एकीकडे देशभरात ‘रामायण’ या सिनेमाने धुमाकूळ घातला आहे. या सिनेमाने कोटीच्या कोटीची उडुाणे घेतली आहे. या सिनेमाचं कौतुक होत असतानाच टीएमसीचे खासदार आणि माजी क्रिकेटपटू कीर्ती आझाद यांनी एक विधान केलं आहे. समाजवादी पार्टीचे प्रमुख अखिलेश यादव यांनी अयोध्येतील राम मंदिरात जाण्याचा प्रस्ताव दिल्यानंतर कीर्ती आझाद यांनी हे विधान केलं आहे. त्यामुळे त्याचे राजकीय वर्तुळातून पडसाद उमटत आहेत.

कीर्ती आझाद यांनी माता सीतेचा उल्लेख करून हे विधान केलंय. मी आयोध्येतील राम मंदिरात जाणार नाही, असं त्यांनी स्पष्टपणे सांगितलं आहे. त्याचं कारणही आझाद यांनी दिलं आहे. भगवान प्रभू रामाने सीतेची अग्निपरीक्षा घेतली. ती त्यांनी पार पाडली. तरीही त्यांचा प्रभू रामाने त्याग केला, असं कीर्ती आझाद म्हणाले.

देशात 3,200 कोटी देवी देवता आहेत. त्यात रामच फक्त देव आहेत का? मी अयोध्येच्या राम मंदिरात कधीच जाणार नाही. कारण भगवान रामाने आपल्या पत्नीचा त्याग केला होता. सीतेने अग्नि परीक्षा पास केली होती. तरीही त्यांनी माँ सीतेला आपल्या घरातून बाहेर काढलं होतं. तिथे मी का जाऊ? असा सवाल आझाद यांनी केला आहे.

सीतेसाठी लढणार

आपला मिथिलेशी संबंध असल्याचं सांगतानाच, माता सीता मिथिलाची कन्या होती. तिथल्या प्रत्येक व्यक्तीसाठी सीता मैय्या आईसारखी आहे. मी स्वत: सीतेच्या जन्मभूमीतून आलेलो आहे. सीता माझी आई आहे. आमच्या प्रत्येक व्यक्तीची ती आई आहे, असं ते म्हणाले.

प्रभू रामाला मर्यादा पुरुषोत्तम म्हटलं जातं. त्यावरही त्यांनी सवाल केले. अग्नि परीक्षा पास केल्यानंतरही माता सीता आणि तिच्या दोन लहानग्यांना घरातून हाकलून देण्यात आलं. तरीही मर्यादा पुरुषोत्तम? ही कोणती मर्यादा आहे? मी मुलांना काय सांगणार? असा सवाल त्यांनी केला.

काली आणि कामाख्या मंदिराचा उल्लेख

यावेळी त्यांनी आपण धार्मिक असल्याचं स्पष्ट केलं. मी नेहमी कामाख्याला जातो. माँ कालीची पूजा करतो. माझे वडील दुर्गा भक्त होते. मी स्वत: माँ कालीचा भक्त आहे. काली कामाख्या, दक्षिण काली, कालीघाट आणि दिल्लीच्या गोल मार्केटमदील काली मंदिरात मी पूजा केलेली आहे, असंही त्यांनी स्पष्ट केलं.

या मंदिरात गेल्याने, माँ कालीची पूजा केल्याने मी हिंदू ठरत नाही का?, असा सवाल करतानाच सीता मैय्या मिथिलेची कन्या होती. त्यामुळे सीता मैय्यासाठी आवाज उठवला पाहिजे, असं ते म्हणाले. मी राम मंदिरात जाणार नाही, असा पुनरुच्चारही त्यांनी केला.