MP Crime : मध्य प्रदेशात एकाच कुटुंबातील तिघांचा मृत्यू, मुलगी बेशुद्धावस्थेत आढळली; आत्महत्या की हत्या ? गूढ कायम

मध्य प्रदेश : एकाच कुटुंबातील तिघांचा रहस्यमयरित्या मृत्यू (Death) झाल्याची बाब मध्य प्रदेशातील भिंड जिल्ह्यात उघडकीस आली आहे. आई, वडील आणि मुलाचा मृत्यू झाला असून मुलगी बेशुद्धावस्थेत आढळली. ही आत्महत्या (Suicide) आहे की हत्या (Murder) याबाबत गूढ असून मुलगी शुद्धीवर आल्यावरच या घटनेतील रहस्य उलगडेल, असे पोलिसांनी सांगितले. मुलीला उपचारासाठी गोहाड येथील रुग्णालयात नेण्यात आले. मात्र तिची चिंताजनक असल्याने तिला ग्वाल्हेररला हलविण्यात आले. पती-पत्नीचे मृतदेह फासावर लटकलेल्या अवस्थेत, तर मुलगा आणि मुलगी जमिनीवर पडलेले आढळले. सध्या याप्रकरणी आत्महत्येच्या दृष्टीनेच तपास करण्यात येत आहे.

आई, वडिल आणि मुलाचा मृत्यू तर मुलगी बेशुद्ध

कटवा गुर्जर गावात राहणारे धर्मेंद्र यांचे कुटुंब रोज सकाळी लवकर उठते. मात्र शनिवारी धर्मेंद्र यांच्या कुटुंबातील एकही सदस्य उठला नाही आणि कोणीही घराबाहेर पडले नाही. शेजाऱ्यांच्या ही बाब लक्षात येताच त्यांनी याबाबत पोलिसांना माहिती दिली. पोलिसांनी घटनास्थळी दाखल होत धर्मेंद्र यांचा दरवाजा ठोठावला. मात्र आतून काहीच प्रतिसाद येत नव्हता. यानंतर पोलिसांनी दरवाजा तोडून आत प्रवेश केला असता धर्मेंद्र फासावर लटकत असल्याचे दिसले. धर्मेंद्र यांची पत्नी अमरेशही घराच्या आतील खोलीत लटकलेली आढळली. तर 12 वर्षांचा मुलगा प्रशांत आणि 10 वर्षांची मुलगी मीनाक्षी जमिनीवर बेशुद्ध पडले होते. धर्मेंद्र आणि अमरीशसह त्यांचा मुलगा प्रशांत यांचा जागीच मृत्यू झाला, तर मुलगी मीनाक्षी श्वास घेत होती. मीनाक्षीला तात्काळ गोहाड रुग्णालयात नेत प्राथमिक उपचार केल्यानंतर पुढील उपचारासाठी ग्वाल्हेरला रेफर करण्यात आले.

शवविच्छेदन अहवाल आल्यानंतरच सर्व स्पष्ट होईल

घटनेची माहिती मिळताच भिंडचे एसपी शैलेंद्र सिंहही घटनास्थळी पोहोचले. मृत्यूचे कारण स्पष्ट होऊ शकले नाही. मात्र तपास सुरू आहे. या खटल्यात मुलगी एकमेव साक्षीदार असल्याचे दिसते. त्यामुळे तिची साक्ष महत्त्वाची ठरणार आहे. याशिवाय शवविच्छेदन अहवालातून मृत्यूचे कारणही स्पष्ट होणार आहे, असे शैलेंद्र सिंह यांनी सांगितले. (Mysterious death of three members of the same family in Madhya Pradesh)