मोठी बातमी! तुरुंगातून बाहेर येताच माजी कॅबिनेट मंत्री ED च्या ताब्यात; सुटकेचा आनंद काही मिनिटांतच संपला!
दोन पॅन कार्ड प्रकरणात जामीन मिळाल्यानंतर आझम खान यांची ११ महिन्यांनी तुरुंगातून सुटका झाली. मात्र, जेलच्या गेटबाहेर येताच ED च्या पथकाने त्यांना ताब्यात घेतलं. जौहर युनिव्हर्सिटीशी संबंधित कोट्यवधींच्या कथित आर्थिक व्यवहारांमुळे ही कारवाई झाल्याची माहिती आहे.
समाजवादी पक्षाचे ज्येष्ठ नेते आणि माजी कॅबिनेट मंत्री आझम खान यांना रामपूर जिल्हा कारागृहातून बाहेर येताच अंमलबजावणी संचालनालयाने (ED) ताब्यात घेतले आहे. दोन पॅन कार्ड प्रकरणात अलाहाबाद उच्च न्यायालयाकडून जामीन मिळाल्यानंतर आझम खान यांची रामपुर तुरुंगातून सुटका झाली होती. तुरुंगाच्या गेटबाहेर पाऊल ठेवताच आधीच दबा धरून बसलेल्या EDच्या पथकाने त्यांना ताब्यात घेतले. आझम खान यांचे चिरंजीव अब्दुल्ला आझम यांचीही सुटका झाली असून ते आपल्या घरी रवाना झाले आहेत. इडीची ही कारवाई जौहर युनिव्हर्सिटी आणि ट्रस्टमधील कथित मनी लाँड्रिंग (ECIR 2019) प्रकरणाशी संबंधित आहे. ताब्यात घेण्यापूर्वी आझम खान आणि EDच्या अधिकाऱ्यांमध्ये तीव्र शाब्दिक वाद झाला.
नेमकं काय घडलं?
समाजवादी पक्षाचे ज्येष्ठ नेते आणि माजी कॅबिनेट मंत्री आझम खान यांना रामपूर जिल्हा कारागृहातून बाहेर येताच अंमलबजावणी संचालनालयाने (ED) ताब्यात घेतले आहे. दोन पॅन कार्ड (Dual PAN Card) फसवणूक प्रकरणात अलाहाबाद उच्च न्यायालयाने त्यांना आणि त्यांचे सुपुत्र अब्दुल्ला आझम यांना जामीन मंजूर केला होता. तब्बल ११ महिन्यांहून अधिक काळ तुरुंगात काढल्यानंतर आज त्यांची सुटका झाली, मात्र हा आनंद काही मिनिटांचाच ठरला. आझम खान जेलच्या मुख्य गेटबाहेर येताच, तिथे केंद्रीय निमलष्करी दलाच्या (CRPF) तुकडीसह तैनात असलेल्या ED च्या अधिकाऱ्यांनी त्यांना गाडीत बसवले.
मालमत्ता जप्त केलेली
ED ने ही कारवाई २०१९ मध्ये नोंदवलेल्या प्रिव्हेंशन ऑफ मनी लाँड्रिंग ऍक्ट (PMLA) च्या गुन्ह्याखाली केली आहे. मौलाना मोहम्मद अली जौहर ट्रस्ट आणि जौहर युनिव्हर्सिटीच्या उभारणीमध्ये झालेल्या सुमारे ४१६ कोटी रुपयांच्या संशयास्पद आणि अघोषित आर्थिक व्यवहारांचा हा तपास सुरू आहे. नुकतीच २८ ऑक्टोबर रोजी ED ने या विद्यापीठाची १,१७० कोटी रुपयांची मालमत्ता तात्पुरती जप्त केली होती.
आझम खान यांच्या स्वागतासाठी तुरुंगाबाहेर शेकडो कार्यकर्त्यांची मोठी गर्दी जमली होती. मात्र ED ची वाहने आणि कारवाई पाहून समर्थक आक्रमक झाले आणि त्यांनी जोरदार घोषणाबाजी सुरू केली. मात्र ताबा घेण्यापूर्वी आझम खान आणि तपास अधिकाऱ्यांमध्ये तीव्र वाद झाला.
ED चे अधिकारी आझम खान यांना अटक करण्याची प्रक्रिया पूर्ण करून, त्यांना गाझियाबाद येथील विशेष PMLA न्यायालयात हजर करणार आहेत, जिथे त्यांची रिमांड मागितली जाईल. दरम्यान, त्यांचे चिरंजीव अब्दुल्ला आझम मात्र तुरुंगातून थेट आपल्या निवासस्थानी रवाना झाले आहेत. पुढील वर्षी उत्तर प्रदेशात होणाऱ्या विधानसभा निवडणुकांच्या पार्श्वभूमीवर या राजकीय घडामोडीला अत्यंत महत्त्व प्राप्त झाले आहे.
