पक्ष फुटीसाठी कोणी पुरवली रसद? फडणवीसांचं नाव घेत सिब्बल यांचा कोर्टात मोठा दावा, केस फिरणार?
Supreme Court Hearing Fadnavis : शिवसेना हा ठाकरेंचाच पक्ष असल्याचा युक्तीवाद ज्येष्ठ विधीज्ञ कपिल सिब्बल यांनी केला. आज सहाव्या दिवशी शिवसेना कुणाची यावर उद्धव सेनेचा युक्तीवाद सुरू आहे. आता विधीज्ञ देवदत्त कामत हे युक्तीवाद करतील. आजच्या सुनावणीत पहिल्यांदाच मुख्यमंत्री देवेंद्र फडणवीस यांचे नाव घेण्यात आले आहे.
शिवसेनेचा 7/12 कुणाच्या नावे आहे यावरून सुप्रीम युक्तीवाद सुरू आहे. उद्धव सेनेकडून गेल्या सहा दिवसातील सुनावणीत धरदार युक्तीवाद करण्यात आला. राजकीय पक्ष, विधीमंडळ पक्ष, राज्यपाल, विधानसभा अध्यक्ष आणि निवडणूक आयोगाच्या भूमिकेवर सडकून टीका करण्यात आली. उद्धव सेनेला पक्षपातीपणाची वागणूक मिळाल्याचा युक्तीवाद सुनावणीदरम्यान करण्यात आली. ज्येष्ठ विधीज्ञ कपिल सिब्बल यांनी सहाव्या दिवशीचा युक्तीवाद आज संपवला. तर त्यानंतर विधीज्ञ देवदत्त कामत हे ठाकरे सेनेकडून युक्तीवाद करत आहेत. दरम्यान आज पहिल्यांदाच मुख्यमंत्री देवेंद्र फडणवीस यांनी शिवसेना फुटीत काय भूमिका वठवली आणि भाजपने कोणती रसद पुरवली याचा ऊहापोह सिब्बल यांनी केला.
23 जूनच्या ठरावावर भाष्य
23 जूनच्या ठरावावर सिब्बल यांनी जोरदार युक्तीवाद केला. या ठरावानुसारच शिंदेंना पक्ष देण्यात आल्याचा आरोप केला. यासाठी विधानसभा अध्यक्षांनी पक्षपाती भूमिका घेतली. सुनील प्रभू यांनी बोलावलेल्या बैठकीला शिंदेंचे आमदार गैरहजर होते. त्यांना विचारणा केल्यावर तुमचा व्हीप आम्हाला लागू होत नाही असे फुटीर आमदारांनी सांगितल्याची बाजू मांडण्यात आली. सत्तेतील पक्षाने विरोधी पक्षासोबत सत्ता बनावण्यासारखा हा प्रकार असल्याची बाजू सिब्बल यांनी मांडली. त्यांनी युक्तीवाद करताना भाजप आणि देवेंद्र फडणवीस यांच्या भूमिकेवर पहिल्यांदाच भाष्य केले.
फडणवीसांची भूमिका काय?
विधानसभा अध्यक्षांच्या भूमिकेवर बोट ठेवतानाच देवेंद्र फडणवीस यांनी राज्यपालांना बहुमत चाचणी घेण्यास सांगितली असा मोठा दावा सिब्बल यांनी सुनावणीदरम्यान मांडला. विश्वासदर्शक ठरावावरही त्यांनी मोठे भाष्य केले. विश्वासदर्शक ठरावावर भाजपसह बंडखोरांनी मतदान केल्याचं ते म्हणाले. विधीमंडळ पक्षाने एकनाथ शिंदे यांना मुख्य नेता निवडलं, वास्तविक हा अधिकार राजकीय पक्षाचा असल्याचा युक्तीवाद त्यांनी केला. या सुनावणीत पहिल्यांदाच भाजपकडे बोट करण्यात आले आहे.
पक्षफुटीसाठी कुणी रसद पुरवली?
आमदार अगोदर सुरत येथे पोहचले, नंतर ते गुवाहाटीला थांबले. त्यानंतर ते गोव्यात दाखल झाले. ही कडी जुळवत पक्षफुटीसाठी कुणी रसद पुरवली याकडे सिब्बल यांनी थेट भाजपकडे बोट वळवले. या तीनही राज्यात भाजपची सत्ता होती याकडे त्यांनी न्यायालयाचे लक्ष वेधले. बंडखोर आमदार ज्या हॉटेलमध्ये थांबले, त्या भाजपशासित राज्यात होत्या, हे त्यांनी स्पष्ट केले. तर गुवाहाटीला कोण कसं गेलं यावर आता बोलायचं नाही या महत्त्वाच्या मुद्दाला स्पर्श न करता त्यांनी रेटला. फुटीला प्रोत्साहन देण्यासाठी 10 व्या परिशिष्टाचा गैरवापर होऊ न देण्याचे आवाहनही सिब्बल यांनी केले.
