बाथरुममधील सर्वात लोकप्रिय गाणं, उन्हाळ्यात याच गाण्याची असते प्रचंड चर्चा, अनेकजण तर थेट…
48 वर्षांपासून हे गाणं अनेकजण बाथरुममध्ये गेल्यावर गातात. अंगावर पाणी पडताच कधी-कधी अचानक या गाण्याचे बोल लोक गुणगुणतात. कोणतं आहे हे गाणं?
उन्हाळ्याची चाहूल लागली की हिंदी चित्रपटसृष्टीतील अनेक सदाबहार गाणी पुन्हा एकदा कानावर पडू लागतात. त्यापैकी सर्वाधिक लोकप्रिय ठरलेले गाणे म्हणजे ‘थंडे थंडे पानी से नहाना चाहिए’.
हे गाणे ऐकताच उकाड्यातही गारव्याचा अनुभव येतो. आजही उन्हाळ्याच्या दिवसांमध्ये हे गाणं अनेकांच्या प्लेलिस्टमध्ये हमखास ऐकायला मिळते. तब्बल 48 वर्षांनंतरही या गाण्याची लोकप्रियता तशीच कायम असून ते उन्हाळ्यात सर्वांचे आवडतं गाणं मानले जाते.
महेंद्र कपूर आणि आशा भोसले यांच्या दमदार आवाजात साकारलेले हे गाणं 1978 मध्ये प्रदर्शित झालेल्या ‘पति पत्नी और वो’ या चित्रपटातील आहे. संगीतकार रवींद्र जैन यांनी या गाण्याला संस्मरणीय चाल दिली असून गीतकार आनंद बक्षी यांनी हलके-फुलके, विनोदी आणि सहज लक्षात राहतील असे शब्द लिहिले आहेत.
चित्रपटातील हे गाणं एका कौटुंबिक आणि विनोदी प्रसंगावर चित्रित करण्यात आले आहे. अभिनेता संजीव कुमार, अभिनेत्री विद्या सिन्हा आणि त्यांचा मुलगा बाथरूममध्ये थंड पाण्याने अंघोळ करताना हे गाणं गाताना दिसतात.
बादलीचा ढोलक म्हणून वापर, शॉवरखालील धमाल आणि आईलाही बाथरूममध्ये सहभागी करून घेतलेला आनंदी कौटुंबिक माहोल या गाण्याला अधिकच संस्मरणीय बनवतो. आजही हे गाणं अनेकजण बाथरुममध्ये गाताना दिसतात.
