मनाला सुकून देणारं गाणं, जे ऐकताच ओठ नकळत गुणगुणू लागतात, 54 वर्षांपासून प्रत्येक कपलचं आवडतं
70 च्या दशकातील सर्वात लोकप्रिय गाणं, जे आजही प्रत्येक मुलगा किंवा मुलगी प्रेमात पडले की गुनगुनतात. या गाण्यामुळे चित्रपट ठरला होता सुपरहिट.
हिंदी चित्रपटसृष्टीसाठी 70 चे दशक सुवर्णकाळ मानले जाते. त्या काळातील चित्रपटांमध्ये कथा, अभिनय आणि संगीत यांचा सुंदर मिलाफ पाहायला मिळत होता. विशेष म्हणजे त्या वेळच्या गाण्यांना केवळ मनोरंजनाचे साधन मानले जात नव्हते तर अनेकदा तीच गाणी चित्रपटाची खरी ओळख बनत होती.
प्रेम, भावना आणि जीवनातील वास्तव यांना साध्या पण हृदयस्पर्शी शब्दांत व्यक्त करणाऱ्या त्या काळातील गाण्यांची जादू आजही कायम आहे. म्हणूनच जुन्या हिंदी गाण्यांची लोकप्रियता आजच्या नव्या पिढीतही तितकीच टिकून आहे.
याच काळात प्रदर्शित झालेल्या 'शोर' या चित्रपटातील ‘एक प्यार का नगमा है’ हे गाणे प्रेक्षकांच्या भेटीला आले. गाणे प्रदर्शित होताच ते प्रचंड लोकप्रिय झाले आणि काही काळातच हिंदी चित्रपटसृष्टीतील सर्वात सदाबहार गीतांपैकी एक म्हणून ओळखले जाऊ लागले.
या गाण्याला स्वरसम्राज्ञी लता मंगेशकर आणि प्रसिद्ध गायक मुकेश यांनी आवाज दिला होता. गाण्याचे बोल सुप्रसिद्ध गीतकार संतोष आनंद यांनी लिहिले होते. गाण्यातील साधेपणा, भावनिक शब्द आणि मनाला भिडणारी धून यामुळे हे गीत प्रत्येक पिढीच्या मनात घर करून राहिले.
‘शोर’ हा चित्रपट त्या काळातील यशस्वी चित्रपटांपैकी एक ठरला होता. विशेषत: ‘एक प्यार का नगमा है’ या गाण्याने चित्रपटाला वेगळी ओळख मिळवून दिली. आजही हिंदी चित्रपटसृष्टीतील सर्वोत्तम आणि अमर गीतांची चर्चा झाली की या गाण्याचा उल्लेख आवर्जून केला जातो.
