Devendra Fadnavis : ठाकरे बंधूंसोबतच्या भेटीवर मुख्यमंत्री देवेंद्र फडणवीसांचं एका वाक्यात उत्तर; म्हणाले…

राजकीय वर्तुळात गेल्या काही दिवसांपासून ठाकरे बंधूंशी झालेल्या कथित बंद दाराआड चर्चेबद्दल सुरू असलेल्या चर्चांवर मुख्यमंत्री देवेंद्र फडणवीस यांनी स्पष्टीकरण दिले आहे. राजकीयदृष्ट्या एकमेकांवर टीका करत असलो तरी, कार्यक्रमांमध्ये एकत्र येणे ही महाराष्ट्राची संस्कृती आहे. पुढच्या काळातही असे कार्यक्रम झाले पाहिजेत, असे फडणवीस म्हणाले.

प्रसारमाध्यमांमध्ये त्यांच्या आणि ठाकरे बंधूंच्या कथित बंद दाराआड बैठकीबद्दल आलेल्या वृत्तांचा त्यांनी इन्कार केला. “कुठलीही बंद खोलीत बैठक वगैरे झाली नाही,” असे त्यांनी ठामपणे सांगितले. व्यासपीठावर येण्यापूर्वी, काही व्यंगचित्रकारांसहित आम्ही सगळे प्रतीक्षालयात बसलो होतो आणि वेळ झाल्यानंतर सगळे एकत्रित व्यासपीठावर आलो.

त्यामुळे, त्या ठिकाणी कोणतीही राजकीय चर्चा झाली नाही. उलट अतिशय हलकीफुलकी अशा प्रकारची चर्चा झाली. फडणवीस यांनी या भेटीला कोणताही वेगळा राजकीय अर्थ लावू नये असे आवाहन केले. ही केवळ एक सांस्कृतिक भेट होती आणि यातून कोणतेही राजकीय अन्वयार्थ काढू नयेत असेही त्यांनी स्पष्ट केले.