Minakshi Shinde : सर्व प्रश्नांची उत्तरं लवकरच देणार…, राजीनाम्यानंतर मिनाक्षी शिंदे पहिल्यांदाच बोलल्या; आरोपांवर काय म्हणाल्या?

राजीनामा दिल्यानंतर मिनाक्षी शिंदे यांनी लवकरच सर्व प्रश्नांची उत्तरे देणार असल्याची प्रतिक्रिया दिली आहे. टीव्ही ९ मराठीशी बोलताना, त्यांनी राजीनाम्याबद्दल आणि त्यांच्यावरील आरोपांवर आपली भूमिका स्पष्ट केली. शिंदे म्हणाल्या की, आरोप करणे हे विरोधकांचे काम आहे. त्यांनी दिलेल्या राजीनाम्यात सर्व गोष्टी नमूद केल्या असून, त्याबद्दल सविस्तर माहिती लवकरच माध्यमांना देणार असल्याचे त्यांनी सांगितले.

राजीनाम्यामागील नेमके कारण काय किंवा त्यांच्यावर झालेल्या आरोपांवर त्यांची काय प्रतिक्रिया आहे, याबद्दल विचारले असता, त्यांनी थेट उत्तर देणे टाळले. “आरोप करणे हे त्यांचे (विरोधकांचे) काम आहे, आणि त्याला उत्तर द्यायचे की नाही किंवा कधी द्यायचे हे माझा प्रश्न आहे,” असे मिनाक्षी शिंदे म्हणाल्या. त्या स्वतः आणि त्यांचे पती देखील अनेक चौकशींना सामोरे गेले होते, या पार्श्वभूमीवरही त्यांना प्रश्न विचारण्यात आले. त्यावरही त्यांनी “लवकरच सविस्तर चर्चा करेन” असे सांगून अधिक बोलणे टाळले. यामुळे येत्या काळात मिनाक्षी शिंदे काय भूमिका घेतात, याकडे राजकीय वर्तुळाचे लक्ष लागले आहे.