‘आई तुळजाभवानी’ मालिकेत ‘आईराजा’ अध्याय; देवीच्या राज्याभिषेकाचा शुभारंभ
ही भव्य पर्वणी प्रेक्षकांना सोमवार ते शनिवार रात्री 9 वाजता कलर्स मराठी वाहिनीवर पहायला मिळेल. या मालिकेत अभिनेत्री पूजा काळे मुख्य भूमिका साकारतेय. पूजा ही भरतनाट्यम नृत्यांगना आहे. तसंच तिने कथ्थकचंही प्रशिक्षण घेतलं आहे.
कलर्स मराठी वाहिनीवरील 'आई तुळजाभवानी' या मालिकेचं कथानक अत्यंत रंजक वळणावर येऊन पोहोचलं आहे. आता प्रत्येक देवीभक्तासाठी विशेष ठरणारा ‘आईराजा’ अध्याय ‘आई तुळजाभवानी’ मालिकेत सुरू होतो आहे.
देवी पार्वतीचा अवतार असलेल्या आई तुळजाभवानीचे यमुनांचल पर्वतरांगांतील वास्तव्य आणि प्रजेच्या कल्याणासाठी तिचे निर्माण झालेले अढळस्थान या कथानकाचा कळस म्हणजे तुळजापुरातील ‘आईराजा’ अधिष्ठानाची स्थापना.
या भव्य अध्यायात देवीचा राज्याभिषेक सोहळा मोठ्या थाटामाटात पार पडणार आहे. सर्व देव, ऋषि-मुनी, गुरु महादेव आणि सर्वसामान्य जनतेच्या साक्षीने देवीने राज्याभिषेकाला मान्यता दिली असून, हा ऐतिहासिक सोहळा मालिकेत उत्कंठा वाढवणारा आहे.
याच पार्श्वभूमीवर देवीने गावकऱ्यांसोबत साजरा केलेला होळी उत्सव खास आकर्षण ठरणार आहे. गावकऱ्यांनी देवीला अर्पण केलेला पुरणाचा नैवेद्य, तिचे त्यांच्यासोबत केलेले सहभोजन या भागांमध्ये भावनिक आणि भक्तीमय वातावरण निर्माण करणार आहे.
पण दुसरीकडे असुरकुळात होळीच्या निमित्ताने दितीचा आक्रोश टिपेला पोहोचला आहे. विशेष म्हणजे दितीची मुलगी होलिका हिच्याशी संबंधित एक आजवर कधीही न पाहिलेली गोष्ट प्रेक्षकांना पाहायला मिळणार आहे.
