वय विसरायला लावणारी मैत्री! आशा पारेख, हेलेन, वहीदा रहमान व्हेकेशन मोडवर; हिल स्टेशनवर घालवतायत निवांत वेळ
आशा पारेख यांच्या आयुष्यात जेव्हा एकटेपणा आणि नैराश्याचा कठीण काळ आला, तेव्हा वहीदा रहमान आणि हेलेन यांनी त्यांना आधार दिला. या दोघींनी आशा पारेख यांना एकटं पडू दिलं नाही. प्रसिद्धी, यश आणि वय यापलीकडे जाऊन नाती जपता येतात, हे या तिघींच्या मैत्रीतून दिसतं.
बॉलिवूडमध्ये स्टारडम, स्पर्धा आणि प्रसिद्धीच्या झगमगाटात अनेक नाती काळाच्या ओघात मागे पडतात. मात्र, काही मैत्री अशी असते, जी वर्षानुवर्षे टिकून राहते आणि काळासोबत आणखी घट्ट होत जाते. ज्येष्ठ अभिनेत्री आशा पारेख, हेलेन आणि वहीदा रहमान यांची मैत्री याचं उत्तम उदाहरण आहे.
या तिघी सध्या शहरातील गोंधळापासून दूर एका हिल स्टेशनवर सुट्ट्यांचा आनंद घेत आहेत. आशा पारेख यांनी सोशल मीडियावर या खास सहलीची झलक शेअर केली असून, त्यांचे फोटो चाहत्यांचं लक्ष वेधून घेत आहेत. वयाची कोणतीही मर्यादा मैत्रीच्या आनंदाला रोखू शकत नाही, हेच या तिघींनी पुन्हा एकदा दाखवून दिलं आहे.
आशा पारेख यांनी इन्स्टाग्रामवर वहीदा रहमान आणि हेलेन यांच्यासोबतचा फोटो शेअर केला. या फोटोमध्ये तिघीही एकत्र वेळ घालवताना दिसत आहेत. फोटोसोबत आशा पारेख यांनी आपल्या जिवलग मैत्रिणींसोबत प्रवास करणं आणि त्यांच्यासोबत निवांत क्षण घालवणं नेहमीच आनंददायी असल्याचं म्हटलं आहे.
आशा पारेख, वहीदा रहमान आणि हेलेन या तिघींना बॉलिवूडच्या ‘गोल्डन गर्ल्स’ म्हणूनही ओळखलं जातं. आपल्या कारकिर्दीच्या काळात तिघीही लोकप्रिय होत्या. चित्रपटसृष्टीत यश मिळवताना त्यांच्यात स्पर्धा किंवा मत्सरापेक्षा परस्पर आदर आणि जिव्हाळ्याचं नातं अधिक महत्त्वाचं राहिलं.
एकत्र जेवणं, वेगवेगळ्या कार्यक्रमांना उपस्थित राहणं आणि देश-विदेशात फिरायला जाणं, अशा अनेक गोष्टींमधून त्यांनी आपली मैत्री जपली आहे. विशेष म्हणजे, इतकी वर्षं चित्रपटसृष्टीत काम करूनही या तिघींनी एकाच चित्रपटात एकत्र काम केलेलं नाही. तरीही त्यांच्यातील मैत्रीचा धागा कायम मजबूत राहिला आहे.
