अशोक सराफ-निवेदिता सराफ यांनी गाजवलं ‘कान्स’चं रेड कार्पेट; जपली मराठी संस्कृती
Ashok Saraf : मराठी वारशाची शान घेऊन कान्सच्या रेड कार्पेटवर टाकलेलं प्रत्येक पाऊल खास होतं, अशा शब्दांत अशोक सराफ यांनी भावना व्यक्त केल्या आहेत. कान्स फिल्म फेस्टिव्हलच्या रेड कार्पेटवर अशोक सराफ आणि निवेदिता सराफ यांनी सर्वांचं लक्ष वेधून घेतलं.
भारतीय सिनेसृष्टीतील दिग्गज अभिनेते अशोक सराफ यांनी 'कान चित्रपट महोत्सवा'त पदार्पण केलं आहे. 78 वर्षीय अशोक सराफ हे पत्नी आणि अभिनेत्री निवेदिता सराफ यांच्यासोबत यंदाच्या कान फिल्म फेस्टिव्हलमध्ये पोहोचले. त्यांनी मराठी मनोरंजन प्रतिनिधी मंडळाचं प्रतिनिधित्व केलं. रेड कार्पेटवरील अशोक सराफ आणि निवेदिता सराफ यांचा लूक सोशल मीडियावर तुफान व्हायरल होत आहे.
यंदा कान फिल्म फेस्टिव्हलमध्ये अभिनेत्री प्राजक्ता माळी, युट्यूबर अंकिता वालावलकर, पॉडकास्टर जयंती वाघधरे, निर्माते केदार जोशी यांसारखे मराठी कलाकार झळकले. त्यांनी इंडियन पॅव्हेलियनशी संबंधित विविध उपक्रमांमध्ये भाग घेतला. तर 17 मे रोजी कानच्या रेड कार्पेटवर पारंपरिक महाराष्ट्रीयन पोशाखात त्यांनी सर्वांचं लक्ष वेधून घेतलं.
कान फिल्म फेस्टिव्हलमध्ये मराठी प्रतिनिधी मंडळाने आपला सांस्कृतिक वारसा साजरा केला. रेड कार्पेटवरील अशोक सराफ आणि निवेदिता सराफ यांची उपस्थिती सोशल मीडियावर चर्चेचा विषय बनला. त्यांच्या पारंपरिक पोशाखांनी आणि शैलीने सर्वांचं लक्ष वेधून घेतलं.
सुंदर आयव्हरी रंगाचा बंद गला आणि काळ्या रंगाची पँट असा अशोक सराफ यांचा सुंदर पोशाख होता. तर निवेदिता सराफ यांनी फुलांच्या नक्षीकामाची साडी नेसली होती आणि त्यावर जरीकाम केलेली शाल घेतली होती. अशोक सराफ आणि इतरांना कानसारख्या मोठ्या मंचावर पाहून महाराष्ट्रातीलच नाही तर जगभरातील त्यांचे चाहते खूप खुश झाले.
कान फिल्म फेस्टिव्हलमध्ये अशोक सराफ आणि निवेदिता सराफ यांच्यासोबत त्यांचा मुलगा अनिकेतसुद्धा पोहोचला होता. यावेळी तिघांनी खास फोटोशूट केलं.
