अशोक सराफ यांचं 79 व्या वर्षी दुसऱ्यांदा लग्न; कोर्टात एकमेकांना घातल्या वरमाळा
Ashok Saraf : दिग्गज अभिनेते अशोक सराफ आणि निवेदिता सराफ यांनी साताजन्माच्या गाठी पुन्हा एकदा बांधल्या आहेत. लग्नाच्या 37 व्या वाढदिवसानिमित्त त्यांनी हे खास फोटो पोस्ट केले आहेत. या फोटोंवर चाहत्यांकडून लाइक्स आणि कमेंट्सचा वर्षाव होत आहे.
दिग्गज अभिनेते अशोक सराफ आणि निवेदिता सराफ यांची जोडी कलाविश्वातील 'एव्हरग्रीन जोडी' मानली जाते. या दोघांच्या लग्नाला 37 वर्षे पूर्ण झाली असून लग्नाच्या वाढदिवसानिमित्त त्यांनी पुन्हा एकदा एकमेकांच्या गळ्यात वरमाळा घातल्या आहेत. या सुंदर क्षणांचे फोटो निवेदिता सराफ यांनी इन्स्टाग्रामवर पोस्ट केले आहेत.
'37 वर्षांनंतरही तुझ्याकडे पाहून माझ्या मनात तसाच आनंद दाटून येतो. माझा जिवलग मित्र, माझी ताकद आणि माझं आयुष्यभराचं प्रेम असल्याबद्दल तुझे आभार. लग्नाच्या वाढदिवसाच्या खूप खूप शुभेच्छा', अशा शब्दांत निवेदिता सराफ यांनी त्यांच्या भावना व्यक्त केल्या आहेत.
अशोक सराफ आणि निवेदिता सराफ यांनी 27 जून 1989 रोजी गोव्यातील मंगेशीच्या देवळात लग्न केलं होतं. त्यांच्या लग्नाला 37 वर्षे पूर्ण झाली आहेत. सचिन पिळगांवकर, मच्छिंद्र कांबळी, गिरीश घाणेकर, लक्ष्मीकांत बेर्डे आणि त्यांच्या पहिल्या पत्नी रुही, अजय सरपोतदार, वर्षा उसगांवकर यांचे आईवडील हे सर्वजण या लग्नाला उपस्थित होते.
लग्नाला 37 वर्षे पूर्ण झाल्याच्या निमित्ताने अशोक सराफ आणि निवेदिता सराफ यांनी पुन्हा एकदा सात जन्म एकत्र राहण्याची शपथ घेतली आहे. पारंपरिक पोशाखात या दोघांनी एकमेकांच्या गळ्यात पुन्हा वरमाळा घातल्या आहेत. यावेळी निवेदिता सराफ यांनी आकाशी आणि हिरव्या रंगाची साडी नेसली, तर अशोक सराफ यांनी कुर्ता-पायजमा घातला होता.
अशोक सराफ आणि निवेदिता सराफ यांच्या वयात 18 वर्षांचं अंतर आहे. मात्र प्रेमाला वयाचं बंधन नसतं.. हे या दोघांनी वारंवार सिद्ध केलं आहे. "आम्ही सगळ्या भोज्यांना शिवून आलो. परंतु आजही आम्ही एकमेकांच्या बाजूला ठामपणे उभे आहोत. याचं सगळ्यात महत्त्वाचं कारण म्हणजे आम्हा दोघांना एकमेकांविषयी वाटत असलेला आदर,” अशा शब्दांत निवेदिता सराफ व्यक्त झाल्या होत्या.
