तुम्हीही कॅशबॅक आणि रिवॉर्ड्सकडे दुर्लक्ष करता? आजपासून करा वापर, महिन्याला होईल भरघोस बचत
ऑनलाईन शॉपिंग आणि वीजबिल भरताना कॅशबॅक आणि रिवॉर्ड पॉइंट्सच्या माध्यमातून दरवर्षी हजारो रुपयांची बचत करण्याची गुप्त पद्धत समोर आली आहे. रिवॉर्ड्स एक्सपायर होण्यापूर्वी त्यांचा वापर कसा करावा आणि अनावश्यक खर्च टाळून स्मार्ट बचत कशी करावी, हे सविस्तर वाचा.
आजच्या डिजीटल युगात आपण वीजबिल भरण्यापासून ते ऑनलाईन शॉपिंगपर्यंत सर्व काही मोबाईलवरून करतो. या व्यवहारानंतर अनेकदा आपण कॅशबॅक (Cashback) आणि रिवॉर्ड पॉइंट्स (Reward Points) कडे दुर्लक्ष करतो. पण योग्य नियोजन करुन तुम्ही या छोट्या वाटणाऱ्या गोष्टींमधून दर वर्षाला हजारो रुपयांची बचत करू शकता.
तुमच्याकडे असलेल्या कार्ड्सचे फायदे तपासा. काही कार्ड्स ऑनलाईन शॉपिंगवर ५ टक्क्यांपर्यंत कॅशबॅक देतात. तर काही इंधन (Fuel) भरण्यानंतर सवलत देतात. ज्या ठिकाणी जास्त खर्च होतो, तिथे त्या विशिष्ट खर्चासाठी बनवलेले कार्ड वापरणे फायदेशीर ठरते.
बँका प्रत्येक ट्रान्झॅक्शनवर पॉइंट्स देतात. अनेकदा हे पॉइंट्स ठराविक काळानंतर एक्स्पायर होतात. हे पॉइंट्स वापरून तुम्ही विमानाची तिकिटे, हॉटेल बुकिंग किंवा ई-कॉमर्स व्हाउचर्स मिळवू शकता. त्यामुळे दर महिन्याच्या शेवटी एकदा तरी तुमचे रिवॉर्ड बॅलन्स तपासा.
थेट शॉपिंग साइटवर जाण्याऐवजी, काही कॅशबॅक अॅप्सद्वारे खरेदी केल्यास तुम्हाला मूळ सवलतीव्यतिरिक्त अतिरिक्त कॅशबॅक मिळतो, जो थेट तुमच्या बँक खात्यात जमा होऊ शकतो.
युटिलिटी बिल म्हणजेच वीज, पाणी, गॅस भरण्यासाठी काही अॅप्स ५० ते १०० रुपयांपर्यंत निश्चित कॅशबॅक देतात. प्रत्येक वेळी वेगवेगळ्या ऑफर्स चेक करून पेमेंट केल्यास छोटी पण खात्रीशीर बचत होते.
कॅशबॅक मिळत आहे म्हणून अनावश्यक वस्तू खरेदी करणे ही मोठी चूक ठरू शकते. १० टक्के कॅशबॅक मिळवण्यासाठी अनावश्यक १००० रुपये खर्च करणे ही बचत नसून तो तोटा आहे. फक्त गरजेच्या वस्तूंवरच ऑफर्स शोधा.
