Marathi Language Row : मराठी शिकायला मुदतवाढ मिळाल्यानंतर मराठी माणूस चिडेल अशा पद्धतीचं रिक्षा चालकांचं सेलिब्रेशन
Marathi Language Row : मुख्यमंत्री देवेंद्र फडणवीस यांनी रिक्षाचालकांना मराठी भाषा शिकण्यासाठी एक वर्षाची मुदतवाढ दिली आहे. त्यांच्या या निर्णयामुळे रिक्षा चालक प्रचंड आनंदात आहेत. म्हणून त्यांनी जे सेलीब्रेशन केलं, त्यामुळे मराठी माणसाला नक्कीच चीड येईल.
मुख्यमंत्री देवेंद्र फडणवीस यांनी रिक्षाचालकांना मराठी भाषा शिकण्यासाठी एक वर्षाची मुदतवाढ दिल्याच्या आनंदात गोरेगाव पूर्व आरे कॉलनीत रिक्षा युनियनकडून जोरदार सेलिब्रेशन करण्यात आलं.
या सेलिब्रेशन दरम्यान मराठी भाषा शिकण्याच्या मुदतवाढीचा आनंद साजरा करताना मुलीला भोजपुरी गाण्यावर नाचवण्यात आल्याचा प्रकार समोर आला आहे.
ढोल-डीजेच्या तालावर गुलाल उधळून हा जल्लोष करण्यात आला, मात्र मराठीच्या मुद्यावरून सुरू असलेल्या वादाच्या पार्श्वभूमीवर भोजपुरी गाण्यावर डान्सचा हा व्हिडीओ आता चर्चेचा आणि वादाचा विषय ठरू शकतो.
परिवहन मंत्री प्रताप सरनाईक यांनी ऑटोरिक्षा आणि टॅक्सी चालकांसाठी मराठी भाषा सक्तीची केली होती. जुजबी, कामापुरती मराठी भाषा बोलता आलीच पाहिजे असं त्यांचं म्हणणं होतं. पण मुख्यमंत्री फडणवीस यांनी आता मुदतवाढ दिली आहे.
सरकारच्या निर्णयानंतर RTO ने मराठी बोलता न येणाऱ्या रिक्षा चालकांविरोधात कारवाई सुरु केली होती. त्यांचे बॅज रद्द करण्याची प्रक्रिया सुरु झालेली. त्या विरोधात या रिक्षा चालकांनी आंदोलनही केलं. ट्रॅफिक जॅम करणारं आंदोलन केलं होतं.
