Govinda: गोविंदा-सुनीताचा आणखी एक मोठा निर्णय; वैवाहिक आयुष्यातील वाद पुन्हा चव्हाट्यावर
Govinda and Sunita Ahuja: अभिनेता गोविंदा आणि सुनीताने आणखी एक मोठा निर्णय घेतल्याची माहिती समोर येत आहे. या निर्णयामुळे त्यांच्या वैवाहिक आयुष्यातील वाद पुन्हा चव्हाट्यावर आला आहे.
अभिनेता गोविंदा आणि पत्नी सुनीता अहुजा यांच्या वैवाहिक आयुष्याबाबत गेल्या काही दिवसांपासून सुरू असलेल्या चर्चांना आता आणखी एक नवा ट्विस्ट मिळाला आहे. दोघांनीही इन्स्टाग्रामवर एकमेकांना अनफॉलो केलं आहे. त्यामुळे सुनीताने जरी घटस्फोट मागे घेतला असला तरी या दाम्पत्याच्या नात्यात खरंच दुरावा निर्माण झाला आहे, अशी चर्चा नेटकऱ्यांमध्ये होत आहे.
सोशल मीडिया प्लॅटफॉर्मवर एखाद्या सेलिब्रिटी कपलने एकमेकांना अनफॉलो केल्यास त्यावर लगेचच नात्यातील दुराव्याच्या चर्चा सुरू होतात. गोविंदा आणि सुनीता अहुजा यांच्याबाबतीतही असंच झालं आहे. याबाबत अद्याप दोघांकडून अधिकृतपणे कोणतीही प्रतिक्रिया समोर आलेली नाही.
सुनीताने गोविंदासोबत राहत नसल्याचं सार्वजनिकपणे सांगितल्यानंतर या दोघांच्या नात्याबाबतच्या चर्चांना अधिक हवा मिळाली. त्यानंतर दोघांच्या नात्यातील तणावाबाबत अनेक तर्क-वितर्क सुरू झाले. सुनीता यांची मुंबईतील कौटुंबिक न्यायालयातील उपस्थितीही चर्चेचा विषय ठरली होती.
याच काळात सुनीताने गोविंदा आणि अभिनेत्री कोमल राणी स्वर्णकार यांच्या कथित नात्याबाबतही आरोप केले. गोविंदाने मात्र अशा दाव्यांवर आक्षेप घेतला असून त्याने त्याच्याबद्दल पसरवल्या जाणाऱ्या खोट्या किंवा बदनामीकारक माहितीविरोधात कायदेशीर कारवाईचा इशारा दिला आहे.
सुनीताने घटस्फोटाची याचिका मागे घेतल्याची माहिती गोविंदाच्या मॅनेजरने दिली. आता इन्स्टाग्रामवर अनफॉलो केल्याच्या चर्चेमुळे गोविंदा आणि सुनीता यांच्या नात्याचा विषय पुन्हा एकदा चर्चेत आला आहे.
