प्रचंड वादग्रस्त गाणं, शब्द ऐकून हनी सिंग देखील संतापलेला, पण बिपाशाच्या डान्सने गाणं ठरलं सुपरहिट
बॉलिवूड इंडस्ट्रीमधील आयटम साँग, जे गुलझार यांच्या शब्दांमुळे सापडलं होतं वादाच्या भोवऱ्यात. या गाण्याचे शब्द ऐकून हनी सिंग देखील संतापलेला. पण बिपाशा बासूच्या ठुमक्यांनी गाणं झालेलं सुपरहिट.
बॉलिवूडच्या इतिहासात अनेक अजरामर गाणी देणारे ज्येष्ठ गीतकार गुलजार यांच्या लेखणीची जादू आजही कायम आहे. ‘तेरे बिना जिंदगी से’, ‘तुझसे नाराज नहीं जिंदगी’, ‘छैंया छैंया’ आणि ऑस्करविजेते ‘जय हो’ यांसारख्या गाण्यांनी त्यांनी प्रेक्षकांच्या मनावर राज्य केले.
मात्र, सुमारे दोन दशकांपूर्वी त्यांच्या एका गाण्यामुळे मोठा वाद निर्माण झाला होता. 2006 मध्ये प्रदर्शित झालेल्या विशाल भारद्वाज यांच्या ‘ओमकारा’ चित्रपटातील ‘बिडी जलाईले जिगर से पिया’ हे गाणं त्यावेळी प्रचंड लोकप्रिय झाले.
गुलजार यांनी लिहिलेल्या या गाण्याच्या काही बोल्ड शब्दांवरून समाजातील एका वर्गाने आक्षेप घेत अश्लीलतेचा आरोप केला होता. दुसरीकडे, ग्रामीण बोलीभाषेचा प्रभावी वापर आणि रूपकात्मक शब्दरचनेसाठी सिनेसमीक्षकांनी या गाण्याचे कौतुक केले.
हे गाणं बिपाशा बासूच्या जबरदस्त नृत्यामुळे विशेष गाजले. सैफ अली खान आणि विवेक ओबेरॉय यांचीही या गाण्यातील उपस्थिती लक्षवेधी ठरली. विशेष म्हणजे, आपल्या गाण्यांमधील बोल्ड शब्दांमुळे अनेकदा चर्चेत राहिलेल्या हनी सिंगनेही गुलजार यांच्या या गाण्याचा दाखला देत समाजाच्या दुटप्पी भूमिकेवर प्रश्न उपस्थित केला होता.
‘द टाइम्स ऑफ इंडिया’ला दिलेल्या जुन्या मुलाखतीत त्याने गुलजार यांच्या गाण्यातील काही बोल्ड शब्दांचा उल्लेख करताना म्हटले होते की, दिग्गज गीतकार असे शब्द लिहितात तेव्हा त्यावर फारसा आक्षेप घेतला जात नाही; मात्र त्याच प्रकारची भाषा हनी सिंगच्या गाण्यांत आली की त्याला लक्ष्य केले जाते.
