आम्हीच भारी! टीम इंडियाने इंग्लंडला दाखवून दिलं, अवघ्या 72 तासांत…
जपानविरुद्धच्या 2 धावांच्या विजयानंतर टीम इंडियाने टी-20 आंतरराष्ट्रीय क्रमवारीत पुन्हा नंबर 1 स्थान मिळवलं आहे. नुकतंच इंग्लंडने श्रीलंकेविरुद्धची टी-20 मालिका जिंकल्यानंतर भारताला मागे टाकत अव्वल स्थान मिळवलं होतं.
सानो येथे भारत आणि जपान यांच्यात खेळल्या गेलेल्या क्रिकेटच्या इतिहासातील पहिल्या ऐतिहासिक टी-20 सामन्यानंतर आयसीसी रँकिंगमध्ये मोठा फेरबदल पाहायला मिळाला आहे. जपानवर मिळवलेल्या 2 धावांच्या निसटत्या विजयाचा थेट फायदा भारताला झाला असून, भारतीय संघाने पुन्हा एकदा टी-20 क्रिकेटमधील नंबर 1 चा ताज आपल्या डोक्यावर चढवला आहे.
नुकतेच इंग्लंडने श्रीलंकेला टी-20 मालिकेत धूळ चारत भारताकडून हे अव्वल स्थान हिरावून घेतले होते. मात्र, भारताने अवघ्या 72 तासांत इंग्लंडला सडेतोड प्रत्युत्तर देत त्यांना पुन्हा खाली खेचले आहे.
ताज्या आयसीसी क्रमवारीनुसार, भारत आणि इंग्लंड या दोन्ही बलाढ्य संघांचे 269 इतके समान रेटिंग पॉईंट्स आहेत. परंतु, एकूण पॉईंट्सच्या (Total Points) आधारे भारताने इंग्लंडला पछाडत हे पहिले स्थान पटकावले आहे.
दुसरीकडे, या अटीतटीच्या सामन्यात जागतिक क्रिकेटवर अधिराज्य गाजवणाऱ्या भारतीय संघाला घाम फोडणारा जपानचा संघ सध्या आयसीसी क्रमवारीत 74 रेटिंग पॉईंट्ससह 41 व्या स्थानावर आहे.
मुळात बेसबॉलची सर्वाधिक आवड असणाऱ्या या देशात क्रिकेट फारसे लोकप्रिय नाही, तरीही त्यांच्या नवख्या संघाने बलाढ्य भारताला दिलेली ही कडवी झुंज खरोखरच कौतुकास्पद ठरली आहे.
