मुंबईकरांनो सावधान, वेस्टर्न एक्सप्रेस हायवेवर भीषण अपघात, गाड्या एकमेकांवर आदळल्या
वेस्टर्न एक्सप्रेस हायवेवर पाऊस पडल्यामुळे रस्ता निसरडा होऊन चारचाकी आणि बसचा अपघात झाला. सुदैवाने या अपघातात कोणीही जखमी झाले नाही. मुंबई उपनगरात पावसाने हजेरी लावल्याने नागरिकांना उष्णतेपासून दिलासा मिळाला आहे.
मुंबई उपनगरात आज सकाळपासूनच पावसाने हजेरी लावल्यामुळे एका बाजूला उकाड्याने हैराण झालेल्या नागरिकांना दिलासा मिळाला असला तर दुसऱ्या बाजूला वाहनचालकांसाठी हा पाऊस डोकेदुखी ठरला आहे.
वेस्टर्न एक्सप्रेस हायवेवर (WEH) पावसाच्या पहिल्या सरींमुळे रस्ता निसरडा झाल्याने एक चारचाकी गाडी आणि बसचा भीषण अपघात झाल्याची घटना घडली आहे. सुदैवाने या अपघातात कोणीही जखमी झालेले नाही.
मिळालेल्या माहितीनुसार, मुंबई उपनगरातील दहिसर, बोरिवली, कांदिवली, मालाड आणि गोरेगाव परिसरात आज अचानक ढग दाटून आले आणि हलक्या पावसाला सुरुवात झाली.
गेल्या काही दिवसांपासून पडत असलेल्या मे हीटच्या उष्णतेमुळे रस्ते तापलेले होते, त्यातच अचानक आलेल्या पहिल्या पावसामुळे वेस्टर्न एक्सप्रेस हायवेवर तेल आणि पाण्याचा थर जमा होऊन रस्ता प्रचंड निसरडा झाला.
यामुळे अनेक गाड्या हायवेवर घसरू लागल्या. याच दरम्यान नियंत्रण सुटल्याने एक चारचाकी कार आणि बसचा जोरदार अपघात झाला. मात्र सुदैवाने या अपघातात कोणीही जखमी झालेले नाही. सर्व प्रवासी सुरक्षित आहेत.
वाहतूक पोलिसांनी दिलेल्या माहितीनुसार, पावसामुळे हायवेवर काही काळ वाहतूक धीम्या गतीने सुरू होती. आता ही वाहतूक पूर्ववर्त करण्यात आली आहे. त्यातच पहिल्या पावसात गाड्या घसरण्याचे प्रमाण वाढत असल्याने वाहनचालकांनी वाहनाचा वेग मर्यादित ठेवावा आणि काळजीपूर्वक गाडी चालवावी, असे आवाहन प्रशासनाकडून करण्यात आले आहे.
