त्याला सगळं काही सांगितलं..; शोएबशी घटस्फोटानंतर सानिया मिर्झाला सतावतेय मुलाची चिंता
घटस्फोटानंतर सानिया तिच्या मुलासोबत राहत असून शोएब मलिकने मात्र अभिनेत्री सना जावेदशी तिसरं लग्न केलं आहे. काही दिवसांपूर्वी शोएब आणि सनाच्याही घटस्फोटाच्या चर्चा होत्या.
भारताची स्टार टेनिसपटू सानिया मिर्झा आणि शोएब मलिक यांच्या नात्याचं सत्य कोणापासून लपलेलं नाही. सानिया आणि शोएब यांनी 2010 मध्ये लग्न केलं होतं. परंतु 2023 मध्ये घटस्फोट जाहीर करत त्यांनी चाहत्यांना मोठा धक्का दिला.
सानिया आणि शोएब यांना एक मुलगा असून त्याचं नाव इजहान असं आहे. घटस्फोटानंतर तो आई सानियासोबतच राहतोय. सानिया एकटीच त्याचं संगोपन करत आहे. नुकत्याच दिलेल्या एका मुलाखतीत ती एकल मातृत्वात येणाऱ्या समस्यांविषयी मोकळेपणे व्यक्त झाली.
"मी माझ्या मुलाला सर्व गोष्टी स्वत:च सांगते. माझ्या नात्याबद्दलच्याही सर्व गोष्टी मीच त्याला सांगते. कारण बाहेरून काही वेगळ्या गोष्टी कळून त्याचा गैरसमज होऊ नये, म्हणून मी आधीपासूनच त्याची काळजी घेते", असं सानियाने स्पष्ट केलं.
"त्याला बाहेरून काहीच कळता कामा नये. जे आहे, जसं आहे.. ते सर्व मी स्वत:च सांगण्याचा प्रयत्न करते. माझ्या मते मुलांसाठी सर्वकाही नॉर्मलाइज करायला हवं. जेणेकरून काहीही समजल्यानंतर त्याला भीती वाटू नये", असं ती पुढे म्हणाली.
आपल्या मुलाने परिस्थितीचा सामना करायला शिकायला हवं, यासाठी मुलाला सर्वकाही सांगत असल्याचं, त्याच्यासोबत सर्वकाही शेअर करत असल्याचं सानिया मिर्झाने यावेळी मान्य केलं.
