Shafali Verma : शतक एक विक्रम अनेक! शेफालीने जपान गाजवलं; एकाच सामन्यात 6 मोठे विक्रम, नेमके कोणते?
Shafali Verma 6 Records : एशियन गेम्स 2026 च्या उपांत्य फेरीत शेफाली वर्माने बांगलादेशविरुद्ध वादळी शतक झळकावत एकाच खेळीत अनेक विक्रमांना गवसणी घातली. शेफालीने अवघ्या 49 चेंडूंत शतक पूर्ण केलं. तिच्या खेळीत 3 चौकार आणि 9 षटकारांचा समावेश होता. 204.08च्या स्ट्राईक रेटने केलेल्या या तुफानी फलंदाजीच्या जोरावर भारताने 195 धावांची मोठी धावसंख्या उभारली.
आपल्या आक्रमक फलंदाजीसाठी ओळखल्या जाणाऱ्या शेफालीने इतिहास रचला आहे. वूमेन्स एशियन गेम्सच्या इतिहासात शतक झळकावणारी ती पहिलीच महिला क्रिकेटपटू ठरली आहे. टी20 मध्ये शतक झळकावणं सोपं नसतं, पण शेफालीने हे सहज साध्य केलं. अवघ्या 49 चेंडूंमध्ये शतक पूर्ण करून तिने कर्णधार हरमनप्रीत कौरच्या सर्वात जलद शतकाच्या विक्रमाची बरोबरी केली आहे. हरमनप्रीतने २०१८ मध्ये न्यूझीलंडविरुद्ध हा कारनामा केला होता. (सर्व फोटो सौजन्य: बीसीसीआय वुमन्स ट्वीटर)
वूमेन्स टी20 इंटरनॅशनलमध्ये भारताकडून शतक झळकावणारी शेफाली ही केवळ तिसरी खेळाडू बनली आहे. याआधी फक्त हरमनप्रीत कौर (1 शतक) आणि स्मृती मंधाना (2 शतके) यांनाच ही करामत करता आली होती.
या सामन्यापूर्वी शेफालीच्या नावावर 95 षटकार होते. बांगलादेशविरुद्ध पाचवा षटकार मारताच तिने 100 षटकारांचा टप्पा ओलांडला. भारताकडून (मंधानानंतर) 100 षटकार मारणारी ती दुसरी, तर जगभरातील केवळ पाचवी महिला खेळाडू बनली आहे.
2026 या एकाच वर्षात शेफालीच्या नावावर आतापर्यंत तब्बल 815 धावा जमा झाल्या आहेत. यासह तिने एका कॅलेंडर वर्षात सर्वाधिक धावा करण्याचा स्मृती मंधानाचा 2024 मधील 763धावा) मोठा विक्रम मोडीत काढला आहे.
शेफालीने या खेळीत तब्बल 9 उत्तुंग षटकार ठोकले! यासह तिने टी-20 च्या एका डावात सर्वाधिक षटकार मारण्याच्या बाबतीत हरमनप्रीत कौरला (8 षटकार) मागे टाकले आहे. आता ती भारताकडून एका डावात सर्वाधिक षटकार मारणारी नंबर वन फलंदाज बनली आहे.
