IPL 2023 : केएल राहुल आणि लखनऊ सुपर जायंट्स संघाचा विचित्र योगायोग, आऊट झाला की होतो असा फायदा
आयपीएल 2023 स्पर्धेत लखनऊ सुपर जायंट्स संघाची जबरदस्त कामगिरी राहिली आहे. गुणतालिकेत 10 गुणांसह दुसऱ्या स्थानावर आहे. या संघाचं नेतृत्व केएल राहुलकडे आहे. पण त्याच्या बाबतीत मागच्या 8 सामन्यात विचित्र योगायोग पाहायला मिळाला आहे.
आयपीएल 2023 स्पर्धेत लखनऊ संघाने एकूण 8 सामने खेळले आहेत. लखनऊने 8 पैकी 5 सामने जिंकत 10 गुणांची कमाई केली आहे. त्यापैकी 3 सामन्यात 200 हून अधिक धावा केल्या आहेत.
लखनऊचा कर्णधार केएल राहुलच्या बाबतीत विचित्र योगायोग पाहायला मिळत आहे. केएल राहुल पॉवरप्लेमध्ये बाद झाला की, संघाची फलंदाजी चांगली झाली आहे.
लखनऊ सुपर जायंट्सने पंजाब किंग्स विरुद्धच्या सामन्यात 257 धावा केल्या. या सामन्यात केएल राहुल 9 चेंडूत 12 धावा करून बाद झाला.
आरसीबी विरुद्धच्या सामन्यातही केएल राहुल 20 चेंडूत 18 धावा करून तंबूत परतला. या सामन्यात लखनऊ सुपर जायंट्सने विजयासाठी दिलेल्या 213 धावा पटकावल्या.
चेन्नई विरुद्धच्या सामन्यातही केएल राहुल 18 चेंडूत 20 धावा केल्या. तेव्हा चेन्नई विरुद्ध 205 धावा केल्या. लखनऊ सुपर जायंट्सने दिल्ली कॅपिटल्स विरुद्ध 193 धावांची खेळी केली. तेव्हा केएल राहुलने 12 चेंडूत 8 धावा केल्या होत्या.
केएल राहुलने संघासाठी जेव्हा जेव्हा उत्कृष्ट कामगिरी केली तेव्हा संघाची धावसंख्या कमी राहिली आहे. पंजाब किंग्जविरुद्धच्या सामन्यात केएल राहुलने 56 चेंडूत 74 धावा केल्या. या सामन्यात संघाला केवळ 159 धावा करता आल्या. राजस्थान रॉयल्सविरुद्धच्या सामन्यात केएल राहुलने 32 चेंडूत 39 धावा केल्या. तेव्हा संघाला 154 धावा करता आल्या.
केएल राहुलने गुजरात टायटन्सविरुद्ध 61 चेंडूत 68 धावा केल्या. या सामन्यात लखनऊ सुपर जायंट्सचा 128 धावांनी पराभव झाला.
आकडेवारीनुसार, केएल राहुलने 20 पेक्षा कमी चेंडूंचा सामना केला किंवा लवकर आऊट झाला, तर लखनऊ सुपर जायंट्सला फायदा होत आहे.पॉवरप्लेमध्ये संथ गतीने बॅटींग करण्याचा फटका संघाला बसत आहे.
संथ फलंदाजीमुळे राहुलने काही सामने गमावल्याची चर्चा चाहत्यांमध्ये आहे. या पार्श्वभूमीवर केएल राहुल लवकर बाद व्हावा अशी लखनऊच्या फॅन्सची स्थिती आहे.
