बायकोला बेदम मारा…नवऱ्याला मिळणार नाही शिक्षा, तालिबानचा हादरवून टाकणारा कायदा!
अफगाणिस्तानातील तालिबान सरकारने अजब असा कायदा आणला आहे. तिथे बायकोला मारणे वैध ठरवण्यात आले आहे. या कायद्याची जगभरात चर्चा होत आहे. लोक तालिबानच्या या कायद्याला विरोध करत आहेत.
अफगाणिस्तानातील तालिबान सरकार कधी काय निर्णय घेईल हे सांगता येत नाही. मिळालेल्या ताज्या माहितीनुसार तालिबानने घरगुती हिंसाचार योग्य असल्याचे म्हटले आहे. पती आपल्या पत्नीला घरात मारू शकतो. फक्त मारत असताना पत्नीचे हाड मोडायला नको, असे तालिबानने म्हटले आहे.
तालिबानच्या या धोरणाचा मानवाधिकार संघटनांकडून निषेध केला जातोय. तालिबानी नियमानुसार पती हा घराचा मालक असतो. तो आपल्या पत्नीला दंडाच्या रुपात मारझोड करू शकतो. तालिबानने शरिया कायद्याच्या आधारे एक संविधान तयार केले आहे.
तालिबानच्या नव्या सविधानात 10 खंड आणि 119 अनुच्छेद आहेत. याच संविधानात घरगुती हिंसाचार वैध मानण्यात आला आहे. तालिबानच्या या नव्या संविधानाविषयी द इंडिपेंडेन्ट या माध्यमाने एक वृत्त दिले आहे. या वृत्तानुसार तालिबानच्या अनुच्छेद 90 नुसार घरगुती हिंसाचाराला वैध ठरवण्यात आले आहे.
पती पत्नीला मारत असताना पत्नीचे हाड तुटले तर पत्नी तक्रार करू शकते. त्यासाठी पत्नीला न्यायाधीशाकडे जावे लागेल. न्यायाधीशाला लागलेल्या जखमा दाखवाव्या लागतील. त्यानंतर पतीला 15 दिवसांपर्यंत शिक्षा होऊ शकते.
पत्नी आपल्या पतीच्या परवानगीविना आपल्या नातेवाईकांना भेटत असेल तर पत्नीला 3 महिन्यांपर्यंतची शिक्षा होऊ शकते, असेही तालिबानच्या संविधानात नमूद केलेले आहे. तालिबानच्या या संविधानात जुलमी तरतुदी असल्याचे म्हणत अनेक स्तरातून त्याचा विरोध केला जात आहे. त्यामुळे भविष्यात काय होणार हे पाहणे महत्त्वाचे ठरणार आहे.
