भुवनेश्वरीचे उद्योग, गुन्हे कळत नाहीत इतका बैल अधिपती आहे का? नेटकरी भडकले
'तुला शिकवीन चांगलाच धडा' या मालिकेचा नवा प्रोमो पाहून नेटकरी चांगलेच भडकले आहेत. अधिपतीला भुवनेश्वरीचे गुन्हे आणि उद्योग दिसत नाही का, असा सवाल प्रेक्षकांनी केला आहे. अधिपती इतका बैल आहे का, अशा शब्दांत त्यांनी टीका केली आहे.
झी मराठी वाहिनवरील 'तुला शिकवीन चांगलाच धडा' ही मालिका अत्यंत रंजक वळणावर येऊन पोहोचली आहे. भुवनेश्वरीच चारुलता आहे, हे सत्य सर्वांसमोर उघड होतं. त्यानंतरही भुवनेश्वरी स्वत:चा बचाव करते.
"माझ्या जीवापेक्षा माझा लेक माझ्यासाठी जास्त प्रिय आहे. तुम्ही मला लाथाडलं पण मी अधिपतीसाठी इथे राहिली. तुम्ही झिडकारलंत तरी मी अधिपतीकडे बघून दिवस काढले," असं ती चारुहासला म्हणते.
"माझं सर्व आयुष्य मी या घरासाठी खर्च केलं. या घरासाठी रक्ताचं पाणी केलं. आता तुम्हीच न्याय करा, माझी फसवणूक मोठी की माझं प्रेम," असा सवाल ती सर्वांसमोर चारुहासला करते.
मालिकेचा हा नवीन प्रोमो पाहून नेटकरी भुवनेश्वरी आणि अधिपतीवर चांगलेच भडले आहेत. 'हिच्यावर आरामात पाच ते सहा फसवणुकीचे केस होऊ शकतात. सुनेला दिलेला त्रास, तिला मेंटल हॉस्पिटलमध्ये टाकणं, दोघांचा संसारसुद्धा होऊ न देणं हे सगळं चारुहासने विसरण्यासारखं असेल का', असा सवाल नेटकऱ्यांनी केला आहे.
'भुवनेश्वरीच्या सूडबुद्धी वागण्याचं समर्थन करता येऊ शकत नाही. पण बैलोबा अधिपतीला कारस्थानी आईसाहेबांचे उद्योग आणि गुन्हे कळत नाहीत. इतका बैल आहे तो. बापाच्या एका चुकीची शिक्षा तर अजूनही त्याला हा बाप न म्हणून देतोच आहे,' अशा शब्दांत प्रेक्षकांनी राग व्यक्त केला आहे.
