ज्या क्षणासाठी प्रेक्षक आतुर, अखेर तेच घडलं..; समर-स्वानंदीचे रोमँटिक क्षण, व्हॅलेंटाइन डे होणार खास
झी मराठी वाहिनीवरील लोकप्रिय मालिका 'वीण दोघातली ही तुटेना'मध्ये प्रेक्षक ज्या क्षणाची आतुरतेने वाट पाहत होते, अखेर तो क्षण पहायला मिळणार आहे. समर आणि स्वानंदी यांची रोमँटिक केमिस्ट्री प्रेक्षकांना पहायला मिळणार आहे.
14 फेब्रुवारीला जगभरात 'व्हॅलेंटाइन डे' साजरा केला जातो. यानिमित्ताने झी मराठी वाहिनीवरील 'वीण दोघातली ही तुटेना' या लोकप्रिय मालिकेतही खास रोमँटिक, भावनिक आणि मनोरंजक घडामोडी घडणार आहेत.
‘वीण दोघातली ही तुटेना’ या मालिकेत आजी अधिरावर जबाबदारी टाकते की जसा ती स्वतः व्हॅलेंटाईन डे साजरा करत आहे, तसंच काहीतरी खास समर आणि स्वानंदीसाठीही केलं पाहिजे.
आजीच्या सांगण्यावरून अधिरा एक खास प्लॅन तयार करते. या प्लॅननुसार ती समर, स्वानंदी आणि रोहनला तातडीने एका ठिकाणी पोहोचायला सांगते. तिथे पोहोचल्यानंतर कळतं की ही व्हॅलेंटाइन पार्टी आहे.
या पार्टीमध्ये समर-स्वानंदीचे खास रोमँटिक क्षण प्रेक्षकांना अनुभवता येणार आहेत. मात्र, या आनंदातही मल्लिका मीठाचा खडा टाकायची योजना आखते. आता रोहन हे सगळं सहन करणार का? मल्लिकाचा प्लॅन यशस्वी होणार का ? हे पाहणं उत्सुकतेचं ठरणार आहे.
'वीण दोघातली ही तुटेना' ही मालिका अल्पावधीतच लोकप्रिय ठरली आहे. यामधील तेजश्री प्रधान आणि सुबोध भावे यांची जोडी प्रेक्षकांना खूपच आवडतेय. या दोघांमधील ऑनस्क्रीन रोमँटिक क्षण पाहण्यासाठी चाहते फार उत्सुक आहेत.
