ऐश्वर्या रायचं 27 वर्ष जुनं गाणं! 7 गायकांच्या आवाजाने बनवलं सदाबहार; परदेशात राहणाऱ्यांचं सर्वात आवडतं
परदेशात जाणं अनेकांचं स्वप्न असतं. मात्र, परदेशात स्थायिक झाल्यानंतर आपल्या देशाची, माणसांची आणि आठवणींची ओढ कायम जाणवते. अशाच भावनांना स्पर्श करणारं 'यारों माफ करना' हे गाणं 1999 मध्ये प्रदर्शित झालं होतं. चित्रहारमध्येही या गाण्याला त्याकाळी चांगली पसंती मिळाली होती.
'आ अब लौट चलें' या चित्रपटातील हे गाणं विशेष लोकप्रिय झालं होतं. कुमार सानू, सोनू निगम, अभिजीत, शब्बीर कुमार, अलका याग्निक, विजेता पंडित आणि सऊद खान अशा 7 गायकांनी या गाण्याला आवाज दिला आहे. विशेष म्हणजे हे गाणं तब्बल 8 मिनिटे 37 सेकंदांचं आहे.
या गाण्याचे बोल समीर यांनी लिहिले असून त्यातून मायदेशाबद्दलचं प्रेम व्यक्त होतं. तर नदीम-श्रवण यांनी या गाण्याला संगीत दिलं आहे. परदेशात राहणाऱ्या भारतीयांच्या मनातील भावना या गाण्यातून मांडण्यात आल्या आहेत.
या चित्रपटात अक्षय खन्ना आणि ऐश्वर्या राय मुख्य भूमिकेत होते. तसेच राजेश खन्ना, मौसमी चटर्जी, कादर खान, परेश रावल आणि सतीश कौशिक यांसारखे कलाकारही महत्त्वाच्या भूमिकेत होते.
या चित्रपटाचं दिग्दर्शन ऋषी कपूर यांनी केलं होतं. आरके बॅनरचा हा चित्रपट अवघ्या 150 दिवसांत पूर्ण झाला होता. विशेष म्हणजे यासाठी पुन्हा शूटिंग किंवा पॅचवर्क करण्याची गरज पडली नव्हती.
चित्रपट पूर्ण होताना 2 कोटी रुपयांपेक्षा अधिक आर्थिक नुकसान झाल्याची माहिती समोर आली होती. मात्र, चित्रपट प्रदर्शित झाल्यानंतर त्याला बॉक्स ऑफिसवर चांगला प्रतिसाद मिळाला. 1999 मधील लोकप्रिय चित्रपटांमध्ये 'आ अब लौट चलें'चा समावेश झाला.
