Gujrat Assembly Elections Result | गुजरातमध्ये रविंद्र जडेजाची पत्नी रिवाबा आघाडीवर

अहमदाबादः गुजरात विधानसभेची (Gujrat Assembly) मतमोजणी सुरु झाली असून निकालाचे प्राथमिक कल हाती आले आहेत. या निवडणुकीत सर्वात लक्षवेधी ठरलेल्या मतदारसंघातून महत्त्वाची अपडेट आहे. क्रिकेटर रवींद्र जडेजाची पत्नी रिवाबा जडेजा (Riwaba Jadeja) आघाडीवर आहे.

रिवाबा जडेजा या जामनगर उत्तर या मतदार संघातून निवडणूकीत उभ्या आहेत. भाजपाने अत्यंत विचारपूर्वक रिवाबा यांची या जागेसाठी निवड केली आहे.

रिवाबा यांचे बालपण राजकोट आणि जामनगर परिसरात गेले आहे. रवींद्र जडेजा यांची बहिणदेखील जामनगर येथे महिला काँग्रेस अध्यक्ष आहेत. काँग्रेसचे उमेदवार बिपेंद्र सिंह जडेजा यांच्याशी रिवाबा यांची थेट टक्कर आहे.

नणंद नैना यांनी रिवाबा यांच्याविरोधात जोरदार प्रचार केलाय. तर आम आदमी पार्टीने येथे करसन करमूर यांना संधी दिली आहे.

रिवाबा यांच्या नणंदेनी त्यांच्या विरोधात प्रचार मोहिमच उघडली होती. तर वैयक्तिक टीकाही सर्वाधिक केली.

रिवाबा या लग्नानंतर 6 वर्षांनीदेखील माहेरचंच नाव लावतात, यावरूनही नैना यांनी टीकास्त्र सोडले होते. यावरून जामनगर उत्तर जागेवरून जडेजा कुटुंबातील अंतर्गत कलह समोर आला आहे.