उपसभापती मॉर्निंग वॉकला गेलेले, परत आलेच नाही! शोध घेताच सापडले झाडाला लटकलेल्या अवस्थेत
एक धक्कादायक घटना समोर आली आहे. जालन्यातील उपसभापती सकाळी मॉर्निंग वॉकसाठी घरातून बाहेर पडला होता. त्यानंतर बराच वेळ घरी परता नाही. कुटुंबियांनी शोध घेतल्यानंतर तो लटकलेल्या अवस्थेत सापडला.
जालन्यातील अंबड येथून एक धक्कादायक घटना समोर आली आहे. येथील कृषी उत्पन्न बाजार समितीचे (एपीएमसी) उपसभापती अरुण घुगे यांनी शनिवारी सकाळी मॉर्निंग वॉकला गेल्यानंतर जीवनयात्रा संपवल्याची खळबळजनक घटना घडली आहे. ते घराजवळील शेतातील एका लिंबाच्या झाडाला गळफास घेऊन मृत अवस्थेत आढळले. अरुण घुगे यांनी टोकाचे पाऊल का उचलले? असा प्रश्न अनेकांना पडला आहे. पोलिस या घटनेचा तपास करत आहेत.
नेमकं काय घडलं?
नेहमीप्रमाणे शनिवारी सकाळी मॉर्निंग वॉकसाठी घरातून बाहेर पडलेल्या अरुण घुगे बराच वेळ घरी न परतल्याने कुटुंबीयांनी त्यांचा शोध घेण्यास सुरुवात केली. शोधादरम्यान घराजवळील शेतात त्यांचा मृतदेह झाडाला लटकलेल्या अवस्थेत सापडला. त्यांनी गळफास घेऊन आत्महत्या केल्याचे प्राथमिक तपासात समोर आले. अरुण घुगे यांनी हे टोकाचे पाऊल उचलण्यामागे नेमके कारण काय आहे? हे अद्याप स्पष्ट झालेले नाही. घटनास्थळी कोणतीही आत्महत्या नोट किंवा इतर पुरावा मिळालेला नाही. त्यामुळे या घटनेचे गूढ अधिकच वाढले आहे. उपसभापतीने खरच स्वत:ला संपवले आहे की कोणी तरी हा कट रचून हत्या केली आहे? असा प्रश्न उपस्थित होत आहे. घटनेची माहिती समजताच परिसरात मोठी खळबळ माजली आहे. राजकीय व सामाजिक क्षेत्रातून या घटनेवर शोक व्यक्त करण्यात येत आहे.
पोलिस कारवाई
गोंदी पोलीस ठाण्याच्या पथकाने तत्काळ घटनास्थळी भेट देऊन पंचनामा केला. मृतदेह उत्तरीय तपासणीसाठी पाचोड येथील ग्रामीण रुग्णालयात पाठवण्यात आला. शवविच्छेदनानंतर मृतदेह नातेवाईकांच्या ताब्यात देण्यात आला. पोलिसांनी या प्रकरणाचा सविस्तर तपास सुरू केला असून, आत्महत्येमागील कारण शोधण्याचे प्रयत्न चालू आहेत. अरुण घुगे यांच्या निधनाने बाजार समितीच्या पदाधिकाऱ्यांमध्ये आणि परिसरातील नागरिकांमध्ये शोककळा पसरली आहे.
