शिरसाटांचं उठून जाणं बरं नाही, नुसती तडफड, मनात खदखद… औरंगाबादेत चंद्रकांत खैरेंची टीका

औरंगाबादः आपल्याआधी चंद्रकांत खैरे (Chandrakant khaire) यांचा सत्कार होताना पाहून उठून जाणारे संजय शिरसाट (Sanjay Shirsat) आणि त्यांची समजूत घालणारे खा. इम्तियाज जलील (MP Imtiaz Jaleel) हे दृश्य सध्या राजकारणात प्रचंड चर्चेचा विषय़ ठरतंय. अनुभवी नेता म्हणून माझा आधी सत्कार झाला तर संजय शिरसाट यांनी नाराज होण्याचं काहीच कारण नाही. त्यांनी आधी माझ्याच अंडर काम केलंय. आता आमदार झाले, सत्तेत आले, साहेब झाले म्हणून एवढी मगरूरी काहीच कामाची नाही. जनता पाहतेय, लोक काय म्हणतील, एवढा मगरूर झाला का? शिरसाट सध्या नाराज असले तरी त्यांनी सबुरीनं घ्यावं, असा सल्ला चंद्रकांत खैरे यांनी दिलाय. औरंगाबादमधील एका कार्यक्रमात व्यासपीठावर आमदार, खासदार आणि चंद्रकांत खैरेही उपस्थित होते. यावेळी आधी खैरे यांचा सत्कार करण्यात आला, त्यामुळे नाराज झालेले शिरसाट उठण्याच्या तयारीत होते. पण खा. जलील यांनी त्यांची समजूत काढली आणि खाली बसवलं.

चंद्रकांत खैरे यांचा सल्ला काय?

संजय शिरसाट यांचं हे वागणं योग्य नाही, असं वक्तव्य खैरे यांनी केलं. ते म्हणाले,’ मी सिनियर आहे. मला बोलावलं वर बसवलं. माझं नाव घेतल्यानंतर याला काय झालं? याने माझ्या अंडर काम केलेलंय. त्यांच्या मनात खदखद आहे. इतक्या उड्या मारल्या. मग आत झालं काय तर ? मंत्रिपद न दिल्यामुळे तडफड चालू आहे. ‘साहेब’ आता आमदार असतील. पण ते आमदार होण्यासाठी याच खुर्चीवर बसून मी अडीच हजार फोन केले होते नागरिकांना. शिरसाट निवडून आले. पश्चिमचा आमदार वाढल्याचा मला आनंद झाला. पण आता असं बरोबर नाही. हे जनतेला आवडलं नाही. जनता काय म्हणेल, लगेच मगरूर झाला का….? खा. जलील शत्रू जरी असला तरी त्यांनी समजून सांगितलं. शिरसाट यांचं वागणं म्हणजे बाष्कळपणा आहे. अशा पद्धतीनं वगणं चुकीचं आहे, यामुळेच त्याची प्रगती होत नाही, असं वक्तव्य खैरे यांनी केलं.

भर कार्यक्रमातून शिरसाट उठून जात होते…

गणेशोत्सवाच्या पार्श्वभूमीवर औरंगाबाद पोलीस प्रशासनाने रविवारी समन्वय समितीच्या बैठकीचं आयोजन केलं होतं. यानिमित्तानं सर्वच पक्षांच्या नेत्यांना व्यासपीठावर बोलावण्यात आलं. व्यासपीठावर आमदार संजय शिरसाट, खा. इम्तियाज जलील, आमदार अतुल सावे, डॉ. भागवत कराड यांच्यासह चंद्रकांत खैरेही उपस्थित होते. उपस्थित मान्यवरांचा सुरुवातीला सत्कार समारंभ झाला. यावेळी पोलीस प्रशासनातील अधिकाऱ्याने पहिल्यादा आधी थेट चंद्रकांत खैरे यांचाच सत्कार केला. पण हे प्रोटोकॉलनुसार नाही, असे म्हणत शिरसाट नाराज झाले. व्यासपीठावरून उठून निघून जाऊ लागले. एवढ्यात बाजूलाच बसलेल्या खा. जलील यांनी त्यांना थांबवलं. समजूत काढली आणि जागेवर बसवलं. शिंदेगट आणि शिवसेनेतील मतभेद आता जगजाहीर झालेत. मात्र भर कार्यक्रमात जनतेसमोर झालेला हा प्रसंग सध्या चांगलाच चर्चेत आहे.