Asia Cup 2022 : क्रिकेट सामन्यानंतर पाकिस्तानच्या प्रेक्षकांना मारहाण, शोएब अख्तरने व्हिडीओ केला शेअर

क्रिकेट सामन्यानंतर प्रेक्षक एकमेकांमध्ये भिडले, पाकिस्तानच्या प्रेक्षकांना बेदम मारहाण

Image Credit source: tv9marathi

काल अफगाणिस्तान (Afganistan) आणि पाकिस्तान (Pakistan) यांच्यात रोमांचक सामना झाला. नेमकं कोण जिंकणार अशी परिस्थिती निर्माण झाली होती. त्याचवेळी पाकिस्तानच्या नशीम शहा (Nazim Shah) या फलंदाजाने अंतिम षटकात सामना खेचून आणला. शेवटच्या षटकात सलग दोन षटकार लगावल्याने अफगाणिस्तानचा संघ पराभूत झाला. त्यानंतर अफगाणिस्तानचे खेळाडू मैदानात रडल्याचे पाहायला मिळाले. विशेष म्हणजे काल झालेल्या सामन्यानंतर प्रेक्षक एकमेकांमध्ये भिडल्याचे पाहायला मिळाले. पाकिस्तानच्या प्रेक्षकांना मारहाण झाल्याचा व्हिडीओ शोएब अख्तरने सोशल मीडियावर शेअर केला आहे.

अफगाणिस्तानच्या गोलंदाजांनी सुरुवातीपासून सामन्यावर पकड ठेवली

कालच्या सामन्यात दुबईच्या मैदानात प्रेक्षकवर्ग देखील अधिक होता. अफगाणिस्तानकडून कमी धावसंख्या उभारल्यानंतर पाकिस्तान संघ सहज पाठलाग करेल अशी स्थिती होती. परंतु अफगाणिस्तानच्या गोलंदाजांनी सुरुवातीपासून सामन्यावर पकड ठेवली. त्यामुळे सामना शेवटपर्यंत गेला.

पाकिस्तानचे टीशर्ट घातलेल्या प्रेक्षकांना मारहाण

सामना झाल्यानंतर अफगाणिस्तानच्या प्रेक्षकांनी पाकिस्तानच्या प्रेक्षकांना मैदानात तुफान मारहाण केली आहे. पाकिस्तानचे टीशर्ट घातलेल्या प्रेक्षकांना मारहाण होत असल्याचे व्हिडीओत स्पष्ट दिसत आहे. त्यामुळे अफगाणिस्तानच्या प्रेक्षकांना शोएब अख्तरने खडेबोल सुनावले आहेत.

शोएब अख्तर भडकला

आत्तापर्यंत आफगाणिस्तानच्या चाहत्यांकडून अनेकदा असे कृत्य झाले आहे. हा एक खेळ आहे, तो खेळला पाहिजे, त्याचबरोबर योग्य पद्धतीने खेळला पाहिजे. तुम्हाला या खेळात पुढे जायचे असल्यास तर खेळाडू आणि प्रेक्षकांना अनेक गोष्टी शिकाव्या लागतील असं शोएब अख्तर याने ट्विटमध्ये लिहिले आहे.