U19 : टीम इंडियाची घोषणा, रोहित-इशानसह राहुल द्रविडच्या मुलाची निवड, पहिला सामना कधी?
U19 India Tour Of Sri Lanka 2026 : अंडर 19 टीम इंडियाच्या श्रीलंका दौऱ्याची 4 जुलैपासून सुरुवात होणार आहे. टीम इंडिया या दौऱ्यात 2 मालिकांमध्ये एकूण 5 सामने खेळणार आहे. जाणून घ्या वेळापत्रक.
भारतीय क्रिकेट वर्तुळातून या क्षणाची मोठी बातमी समोर आली आहे. बीसीसीआय निवड समितीने श्रीलंका दौऱ्यासाठी 19 वर्षांखालील भारतीय संघाची घोषणा केली आहे. अंडर 19 टीम इंडिया श्रीलंका दौऱ्यात 3 एकदिवसीय आणि 2 मल्टी डे सामने खेळणार आहे. श्रीलंका दौऱ्याची सुरुवात 4 जुलैपासून एकदिवसीय मालिकेने होणार आहे. यशवर्धन सिंह चौहान भारतीय संघाचं नेतृत्व करणार आहे. तसेच यशवर्धन हाच 2 मल्टी डे सामन्यांत टीम इंडियाची कॅप्टन्सी करणार आहे. तर दोन्ही मालिकांमध्ये लक्ष्य रायचंदानी उपकर्णधार म्हणून खेळणार आहे.
राहुल द्रविडच्या मुलाला संधी
निवड समितीने एकदिवसीय मालिकेसाठी भारतीय संघात माजी प्रशिक्षक आणि फलंदाज राहुल द्रविड यांचा मुलगा अन्वय द्रविड याला संधी दिली आहे. अन्वयचा विकेटकीपर म्हणून समावेश करण्यात आला आहे. तसेच रोहित यादव आणि इशान सूद यांचाही समावेश करण्यात आला आहे. मात्र अन्वयला मल्टी डे मॅचेसमध्ये संधी देण्यात आलेली नाही.
3 सामन्यांची एकदिवसीय मालिका
एकदिवसीय मालिकेतील तिन्ही सामने हे एकाच ठिकाणी हंबनटोटा इथे होणार आहे. सलामीचा क्रिकेट सामना हा 4 जुलै रोजी होणार आहे. दुसरा सामना 1 दिवसाच्या विश्रांतीने 6 जुलै रोजी खेळवण्यात येणार आहे. तर तिसरा आणि अंतिम सामना हा 9 जुलै रोजी होणार आहे.
तसेच 13 ते 16 जुलै दरम्यान पहिली मल्टी डे मॅच गॉलमध्ये खेळवण्यात येणार आहे. तर दुसरा आणि अंतिम सामना हा 20 ते 23 जुलै दरम्यान कोलंबोत आयोजित करण्यात आला आहे.
भारताचा श्रीलंका दौरा, खेळाडूंची नावं जाहीर
🚨 News 🚨
India Men’s U19 squads for Sri Lanka series announced.
More Details 🔽https://t.co/tGJ7FRywxK
— BCCI (@BCCI) June 11, 2026
श्रीलंकेविरुद्धच्या एकदिवसीय सामन्यांसाठी अंडर 19 टीम इंडिया : यशवर्धन सिंग चौहान (कर्णधार), लक्ष्य रायचंदानी (उपकर्णधार), सागर विर्क, विनीत व्ही के, अर्जुन राजपूत, कुशाग्र ओझा, रजत बघेल (विकेटकीपर), अन्वय द्रविड (विकेटकीपर), अनमोलजीत सिंग, वुटकुरी यशवीर गौड, रोहित अनिल यादव, शविन व्ही, काव्या परेश पटेल, मोहित उलवा आणि इशान सूद.
श्रीलंकेविरुद्धच्या 2 मल्टी डे मॅचेससाठी अंडर 19 टीम इंडिया : यशवर्धन सिंग चौहान (कर्णधार), लक्ष्य रायचंदानी (उपकर्णधार), सागर विर्क, पटेल कुश, मनाल चौहान, कुशाग्र ओझा, मानव कृष्णा (विकेटकीपर), आर्यन संदेश सकपाळ (विकेटकीपर), हेमचुदेशन जे, बीके किशोर, रोहित अनिल यादव, काव्या परेश पटेल, प्रियांशू सिंग, प्रणव राघवेंद्र आणि चिगुरुपती वेंकट.
